台式茶飲店開到成行成市，最近台灣著名過江龍春水堂都加入戰團，繼日本後，喺香港西九龍高鐵站開首間分店！

被稱為發明珍珠奶茶嘅始祖春水堂，成立於1983年，據講當初有一位員工嘗試將當地小食粉圓同冰奶茶混合埋一齊，發明咗第一杯珍珠奶茶。就係因為依杯珍奶，奠定咗春水堂喺台灣茶飲界嘅地位！為咗確保香港店同台灣店嘅味道一致，店方堅持所有材料如珍珠同茶葉都由台灣直運到港。

香港店暫時提供23款飲品，必試就係梗係珍珠奶茶($27)，春水堂堅持日日泡新茶，奶茶茶味香濃，茶同奶比例啱啱好，唔會過甜！珍珠沿用品牌30年不變嘅秘方，喺台灣製成後急凍送到港，到調茶嘅時候先烹煮，保持新鮮同Q彈口感！中意味道豐富啲嘅可以試下珍珠紅豆鮮奶茶($33)，紅豆唔會太硬，攪一攪紅豆味道就會融入鮮奶。

想Fresh啲有蕃茄蜜凍飲($29)同翡翠香柚茶($32)，蕃茄蜜飲落酸酸甜甜，唔會有太重生蕃茄嘅味道，好易入口！香柚茶柚子味香濃，配埋綠茶啱啱好！

另外有店員推介最受歡迎嘅珍珠鐵觀音奶茶($31)，唔中意太重奶味可以飲依款，茶味較重無咁heavy！

香港分店暫時只提供外賣服務，不過預計年底前就會開埋「春水堂人文茶館」，提供經典台式小吃同飲品，到時就可以一邊嘆茶一邊食下正宗台灣小食啦！

春水堂

地址: 尖沙咀柯士甸道西3號香港西九龍站售票大堂B1層5號舖

文、相、片：Yanica