對甜品控嚟講，食甜品無分季度，一年四季、一日到黑都可以食。之但係，炎炎夏日，有時真係會熱到冇乜胃口，咁點算？嗯，以下有幾款清新果味嘅蛋糕介紹返。

果味系列蛋糕    芝樂坊餐廳

呢間嚟自美國嘅芝士蛋糕店，上個月開張嗰陣已經受到大眾嘅關注，不過可能好多人去到，都淨係識食佢哋嘅招牌鮮士多啤梨芝士蛋糕，但查實喺佢哋廿幾款cake當中，仲有其他果味系列㗎。

想要酸啲嘅，就要揀青檸芝士蛋糕，畀定心理準備你，酸度堅係高呀，但係食到飽飽時食返啲酸嘢，感覺好似好啲。

但如果怕太酸呢，又可以要個芒果青檸芝士蛋糕，有芒果做返中和，酸中帶甜，而且特別在於，呢個cake係馬卡龍餅底呀，上面仲有層層椰絲，整體口感好多變化。

檸檬馬令芝士蛋糕嘅酸度相對較低，除非你食中成條檸檬皮啦，而蛋糕面層嘅半溶棉花糖夾埋檸檬mousse一齊食，甜度剛好。

至於鍾意香蕉製品嘅朋友仔，就梗係要揀鮮香蕉忌廉芝士蛋糕啦。唔淨止碟邊圍滿香蕉，連件cake都好香蕉。上層係香蕉cream，下層係香蕉芝士蛋糕，食落第一啖係幾有驚喜呀。

BTW，嗌埋芒果沙冰或者士多啤梨鮮果沙冰，成件事就更加有夏日感覺喇。

皇牌鮮櫻桃黑森林蛋糕    Cova Ristorante & Caffe

如果係呢間舖頭嘅忠粉，應該都計到差唔多又係時候有皇牌鮮櫻桃黑森林蛋糕食喇！佢哋採用嘅意大利黑櫻桃，係得6月中至7月先至有咋。黑櫻桃本身就好多汁，果肉又好甜，配埋落朱古力蛋糕度，就甜上加甜喇。

文、相：Kar