過完新年話咁快就情人節～唔少酒店都有推出情人節下午茶，各有特色，睇吓邊間啱你！
「參」靈之旅下午茶 香港美利酒店Garden Lounge
聯乘韓國高端護膚品牌雪花秀Sulwhasoo，帶嚟期間限定嘅「參」靈之旅下午茶！鹹點方面精心打造一系列融合東西方風味美饌，韓式烤紅椒堅果醬帶子枝豆餡餅用香脆鬆化嘅批皮包住鮮甜帶子，加埋韓式辣醬同西班牙烤紅椒堅果醬，風味獨特，絕對係開胃之選。甜品環節有人參慕絲芝士蛋糕，入口絲滑，帶淡淡人參香氣。柚子白朱古力慕絲圓餅外層係幼滑白朱古力，內裡係清新爽口嘅葡萄柚果凍，一咬落去即時果香爆發，好解膩。飲品方面仲有人參咖啡系列，包括牛奶咖啡、泡沫牛奶咖啡同短笛咖啡，好味又養生。
供應日期: 由即日起至2025年3月31日
情人節下午茶航遊 張保仔Aqualuna
圖：官網
今個情人節，帶埋另一半登上Aqualuna傳統紅帆船，喺維港浪漫航遊，享受一個難忘嘅甜蜜時光。2月14日當日限定，點心航遊同下午茶航遊會特別推出香滑白朱古力慕斯甜點，內藏奢華Amarena黑櫻桃，再以食用玫瑰點綴，為呢趟旅程增添浪漫氛圍。仲可以一邊歎住Dim Sum Library廚師精心製作嘅點心，再加埋來自Aqua餐廳嘅精緻蛋糕甜點，一定唔會令你失望～
供應日期: 2025年2月14日
香格里拉夢幻號 港島香格里拉大堂酒廊
圖：官網、Missevelynho
今次呢間酒店特別準備咗一系列繽紛又充滿情調嘅鹹甜美點，每一口都係細膩層次，帶嚟無與倫比嘅味覺享受。鹹點推介半熟水煮鵪鶉蛋三文治配魚子醬及新鮮香草，以細緻嫩滑嘅鵪鶉蛋為主角，蛋黃微微流心，入口即散發濃郁蛋香，加上鹹香細膩嘅魚子醬同清新香草，層次感豐富；煙燻三文魚法式三文治配酸忌廉及檸檬醬魚肉鮮嫩，帶有淡淡煙燻香氣，配搭滑溜順口嘅酸忌廉同清新嘅檸檬醬鮮香又唔膩。甜點方面每款都精心設計，充滿浪漫元素，為情人節增添一份甜蜜氣息。
供應日期: 2025年2月14日
Bamford聯乘下午茶系列 Salisterra
同英國高端生活品牌Bamford合作，帶嚟全新下午茶體驗，以Bamford Woodland Moss木苔系列為靈感，將大自然嘅氣息同永續理念融入每一道精緻美點。鹹點方面有迷迭香蘋果豬肉腸捲，香脆牛油酥皮包住多汁豬肉餡，蘋果嘅微甜加上迷迭香嘅清香，味道層次豐富，充滿英式風味。甜品方面菠菜芝士蛋糕幾特別，輕盈嘅菠菜慕絲襯托住濃郁芝士，口感綿密滑順；蘋果及天竺葵馬卡龍，外殼酥脆，內餡幼滑甜美，蘋果果香同天竺葵嘅芳香交織，清新又帶點優雅。
供應日期: 即日起至三月底
冬日小鎮禮盒下午茶 唯港薈Green
聯乘GODIVA呈獻嘅期間限定「冬日小鎮禮盒」下午茶，精緻點心隱藏喺金光閃閃嘅禮物盒內，當你打開禮盒，滿滿驚喜等緊你發掘。下午茶首先由三款精選鹹點揭開序幕，主菜就有香烤澳洲M5和牛牛頸脊配GODIVA黑朱古力薯蓉，牛肉肉質細緻，黑朱古力薯蓉帶來獨特嘅甘香；香煎阿根廷紅蝦伴燴白腰豆配GODIVA粉紅朱古力忌廉汁，肉質彈牙，白腰豆煙韌細膩，粉紅朱古力忌廉汁帶出溫和奶香，提升整體口感。最矚目一定係以金光閃閃禮物盒造型呈現嘅甜品層架，打開透明禮盒後，滿載各款精緻甜點，包括栗子拿破侖、慕絲焦糖蘋果、GODIVA朱古力黑森林杯子蛋糕等，超吸晴！
供應日期: 即日起至3月2日
文: Yanica
