可愛嘅卡通主題Cafe唔係日本專利！中環呢間Cafe就同本地創作卡通人物聯乘，推出期間限定餐點，將白雲先生同彩虹妹妹變成唔同賣相吸引又好味嘅主菜同甜品。可以相機食先之餘，仲有限定禮物㗎。
 

Sogno Cafe+今年再度同本地卡通人物Fluffy House合作，共推出三款主菜、四款甜品同三款飲品。
 

雲上雲（黑松露濃味煙肉空氣蛋白意粉）（Tea Time $108，Dinner $128）

成朵雲都可以食落肚？因為呢朵係空氣蛋白雲！雲下面係黑松露煙肉意粉。蛋白就咁食有入口即溶感，不過就無乜味道，所以記得要用牙籤將上面蛋黃篤穿，再撈埋意粉一齊食呀。
 

意粉有濃郁嘅煙肉鹹香同菇菌香味，而且意粉撈麵蛋黃汁一齊食更Creamy香滑！分量唔細，細食嘅女孩子可以考慮同朋友Share一份呀。
 

別敲我（流心朱古力夾心蛋糕雪糕）（$108）

見到白雲先生叫大家「Hit Me」同木槌，大家係咪已經估到要敲開呢？上層係朱古力奶凍下面有英式香烤杏仁蛋白餅、台式鳯梨手工雪糕同朱古力布朗尼。
 

送上白雲先生木槌一個，一下敲開朱古力立刻有流心效果！分開食嘅話以清甜嘅鳯梨雪糕同富朱古力香嘅布朗尼最吸引，但四層一齊食味道層次更豐富呀。
 

雲出Pool（十勝紅豆湯圓及荔枝藍蝶花水信玄餅） （$68）

睇見都覺得透心涼！白雲先生其實係手工造型湯圓，裡面係北海道十勝紅豆。下面係荔枝藍蝶花水信玄餅同甜湯。藍色嚟自藍蝶花嘅天然色素，配自家炒製嘅黑糖漿。
 

因為紅豆甜味十足，所以建議大家手工湯圓唔洗加黑糖漿，先享受有煙韌糯米皮同香甜紅豆餡嘅湯圓。再漿適量黑糖漿淋上水信玄餅。藍蝶花本身無乜味道，靠荔枝果肉同黑糖漿增加甜味。
 

 

兔仔棉花糖朱古力（$68）

飲品都非常萌！兔仔棉花糖漂浮喺香濃熱朱古力上面，差啲唔捨得飲呀。伴白雲先生同彩虹妹妹造型牛油曲奇。
 

雲先生Cappuccino（$58）

惠顧可獲明信片一張，分三期推出，數量有限送完即止

惠顧滿$250，當中包括Fluffy House主菜或甜品，可獲贈雲家族布袋一個（價值$68）

餐廳唔單止有唔少擺設畀大家打卡，仲有特別禮物送返！今次真係可以又食又拎呀，暑假想約朋友一齊Hea返下嘅話又多個好選擇啦。
 

Sogno Cafe+
中環威靈頓街97號威利大廈2樓D室
*Sogno Cafe+ x Fluffy House Pop Up Event 2018活動日期為即日起至2018年10月20日，供應時間為星期一至三14:00-18:00，星期四至五14:00- 22:00，星期六12:00- 22:00，星期日13:30- 22:00

文、相、片：Cathy