大嘥鬼is watching you!! 原來留心啲睇吓，會發現好多餐廳都有大嘥鬼嘅蹤影。全港有超過1,800間餐廳參加咗「咪嘥嘢食店」計劃，願意主動同食客從源頭減少食物浪費同產生廚餘。呢啲食店會提供唔同食物分量選擇，大家可以食幾多嗌幾多，為環保出一分力。

平時出街食飯想支持「咪嘥嘢食店」，都可以經OpenRice進階搜尋出全港「咪嘥嘢食店」。今次我哋就去咗其中兩間小店—渝香餃手工餃子雲吞麵掂、聚來車仔麵，睇吓佢哋有咩惜食措施。

 經OpenRice Apps 進入「進階搜尋」，揀選「菜式」就可以搵到咪嘥嘢食店喇。

【渝香餃手工餃子雲吞麵掂】
九龍灣新開嘅手工餃子店，開業短短9個月就已經吸引到一班熟客。老闆娘開店原因，係因為佢細個嘅時候，佢媽媽就好鍾意包餃子俾佢食。到而家大個咗，佢就想同大家分享呢個童年嘅味道。 

九龍灣餃子小店。因為老闆娘懷念媽媽手包餃子嘅味道，毅然開店。

店內張貼「咪嘥嘢食店」標貼，同食客一齊減少食物浪費。

每日用盡食材 確保新鮮唔浪費
老闆娘堅持每朝6點將新鮮送到嘅豬肉、蔬菜手打成餃子餡，再包成餃子。除咗完全唔用雪藏豬肉之外，仲會因應銷售情況調整食材入貨量，好似白菜豬肉餃子、韭菜豬肉餃子、芫荽豬肉餃子呢啲受歡迎款式嘅食材就會入多啲。確保食材每日都用得盡，唔會因為用唔晒而擺過夜，或者變壞造成浪費。全店餃子賣到大約黃昏6點就會售罄關門喇，想食記住早啲嚟啊。

每朝6點至11點，將新鮮送到嘅豬肉、蔬菜包成餃子，當日賣晒就關店。

新鮮手工餃子，每隻都爆餡脹卜卜。

齊齊依自己食量 適量點菜
每隻餃子都用料新鮮，爆餡脹卜卜，難怪開業未夠一年已經吸引到好多熟客。大部分食客都係附近嘅上班族，一坐低已經知自己想嗌咩同嗌幾多。餐廳貼心提供8隻或者10隻嘅選項，客人可以自己選擇分量點餐。早前更有熟客知道未必食得晒，主動提議將餃子由8隻減至6隻，以免造成浪費。另外如果真係食唔晒，都可以打包帶走㗎。

小店提供8隻/10隻餃子選擇。曾有熟客依自己食量，主動減少餃子分量。

歡迎分段點菜 唔夠喉再加單
如果第一次嚟食未知適合自己嘅分量，老闆娘都好歡迎大家分段點菜，可以嗌8隻餃子先；唔夠食再加至10隻，絕對唔會額外收取費用㗎。店員落單果時，亦都會主動提醒餃子麵有少麵選擇，避免食客過量點菜。下午茶時段仲會提供細分量選擇，有各款餃子配搭小食嘅組合，咁就唔怕食唔晒做大嘥鬼啦。

餃子麵提供少麵選擇。

(前)重慶麻辣小木耳、(後)重慶麻辣萵筍絲
一份餃子配搭小食，食得滿足又能避免分量過多。

呢度主要有湯餃、煎餃、餃子麵選擇，當中湯餃跟配嘅老火湯，每朝用新鮮豬骨、紅蘿蔔等熬製而成，完全係媽媽煮嘅味道!! 

鮮甜老火湯，每日用盡新鮮食材熬湯零浪費。

【聚來車仔麵】
家庭式小店「聚來車仔麵」吸引到好多深水埗街坊幫襯，主打車仔麵、扒飯、爆漿阿華田西多士等。如果附近舖頭熟客嗌外賣，老闆娘仲會用堂食托盤、碗碟、餐具送到，食完再親自收回。除咗夠環保之外，仲好有老香港人情味。

深水埗車仔麵小店。為附近熟客用堂食托盤及餐具提供外賣，環保又有人情味。

招牌車仔麵有多款配料、湯底選擇。

必食秘製蔥油扒飯，可配香煎雞扒或香煎豬扒。

分開多款湯汁熬煮  彈性控制食材分量
老闆娘因為鍾意煮嘢食而開店，所以好有心機自家熬煮咗幾煲大湯汁，用嚟分開熬煮唔同配菜。好似腩汁會用嚟炆牛腩、牛筋；滷水汁用嚟煮豬耳、雞腎、豬大腸；瑞士汁就用嚟煮雞翼等。雖然呢個做法好花時間，但咁樣做除咗每款配料都有特色風味之餘，仲能夠依銷售情況彈性控制食材使用量，減少浪費。

腩汁煮牛腩。小店將各種配菜，分別用腩汁、滷水汁、瑞士汁熬煮，更有獨特風味並能彈性控制食材分量。

滷水汁煮豬耳，彈牙入味。

瑞士汁煮雞翼，輕甜濃郁好開胃。

特設多個雪櫃 以正確溫度儲存食材
除咗控制入貨量，適當儲存同處理都可以避免因食材腐壞而造成浪費㗎。所以小店設有多個雪櫃，依照食材特性正確控制溫度，減低食材變壞嘅機會。

車仔麵店當然有多種粉麵啦，好似米粉、米線、河粉等，都會放入雪櫃保存。有人落單，餐廳先會拎所需嘅分量出嚟煮，避免麵質受室溫影響而變腍變壞，食落都特別彈牙啊。

以適當溫度儲存粉麵，有食客落單先取出使用，防止污染。

對於呢度最受歡迎嘅車仔麵配料同肉扒—牛腩、牛筋、雞扒、豬扒等，餐廳就會預先拎出第二日要用嘅分量，等佢哋有足夠時間解凍之後再醃一日。呢個做法令肉扒唔會有陣雪味，又可確保未使用食材喺雪櫃正確儲存。

另外，取用食材都有學問㗎。按「先入先出」原則取用，將最先買的材料放喺當眼處，由舊至新取用食材存貨，就可以避免食材過期變壞而造成浪費啦，我哋喺屋企都可以參考呢啲善存食材嘅小技巧㗎。

密封擺放醃製肉類，醃足一日都唔擔心受污染。

少麵少飯 唔做大嘥鬼
當大家見到車仔麵餐牌有咁多餸揀，真係好易唔小心嗌多咗。所以店家餐牌好貼心咁提醒食客有少粉麵/少飯選擇。如果真係食唔晒，大家都可以打包帶走，唔做大嘥鬼。

餐牌提醒有少粉麵/少飯選擇。

妥善回收廢食油 實現轉廢為能
食完車仔麵，有咩爽得過食件甜品？估唔到爆漿阿華田西多士係此店嘅名物之一!! 上面灑滿阿華田碎碎，一切開即刻爆漿，加埋牛油、煉奶，食落真係有甜滋滋嘅幸福感。

不過計埋小店其他煎炸食物—招牌煎餃子、招牌鮮炸肉丸、煎釀三寶等，每星期都會產生唔少廢食油㗎，所以小店就好有心聯絡回收商，每兩星期上門回收廢食油，用嚟轉化成生物柴油、實現轉廢為能。

爆漿阿華田西多士。上面灑滿阿華田碎碎，一切開即刻爆漿。

每兩星期回收廢食油，轉化成生物柴油。