主打藝術甜品嘅呢間韓國雪糕店，最近又進駐咗入去K11 MUSEA，新店除咗有當店限定嘅雪糕外，仲設有「店中店」！即係一入門口你以為佢賣雪糕咩？佢又真係賣雪糕嘅，但再行入啲，推開木門，就係鐵板燒嘅世界，可以話係「外冷內熱」喔！

相信大家對佢哋嘅招牌牛奶雪糕都唔會陌生，以有機牛奶製作，奶味香濃。呢間旗艦店就利用呢款雪糕，再創作多兩款新店限定同時係期間限定嘅甜品，分別係日本靜岡蜜瓜雪糕，同焦糖咖啡雪花冰。前者以時令日本靜岡溫室蜜瓜製作，杯底先以蜜瓜肉打成蜜瓜汁，唧上雪糕後又再嗶埋粒粒新鮮果肉落去，令到奶香中都可以啖啖滲透住蜜瓜嘅清甜。

至於後者，底層用韓國刨冰機製作牛奶雪花冰，口感比一般嘅更綿密，on top又有唧上焦糖醬嘅牛奶雪糕，然後可以自行按喜好倒入一定份量嘅咖啡，味道香濃得嚟仲有啲冰火交融嘅效果。

 韓式泡菜炒飯

 韓式香辣豬肩肉伴魷魚飯

店中店嘅鐵板燒餐廳，係首次由韓國引入香港，有單點肉類、海鮮、炒飯或套餐等，鍾意嘅仲可以坐喺吧枱前睇住師傅「表演」呢~ 無論係韓式泡菜炒飯定係韓式香辣豬肩肉伴魷魚飯，都係大大份，辣度適中。

但如果咩都想食啲嘅，就最好叫個One Tray 套餐喇，要肉有肉，要海鮮有海鮮。主菜可以選要肉扒、豬肋骨或者三文魚扒等~ 其中韓牛西冷扒肉色粉嫩，口感鮮嫩。韓式炒辣海鮮呢都唔算好辣嘅，仲帶有鮮味添。

海鮮控試埋韓式海鮮火鍋湯就啱晒，湯底以魚仔、蝦、昆布等十幾種材料熬煮8個鐘，成個煲都係海鮮，又有鮑魚，又有扇貝同埋多款蜆殼類，兼且可以睇住師傅即場拉麵，係韓式手撕麵片嚟，煙煙韌韌咁，索晒啲湯又幾惹味。

想中和油膩感嘅最好就係飲返杯以17種植物提煉出嚟嘅十七茶，淡淡茶香中帶清爽嘅感覺。舖頭同時都有茶包、有機牛奶麵包、韓國紅豆粥等售賣。

百味堂‧鐵
地址：尖沙咀梳士巴利道18號Victoria Dockside K11 Musea B1樓B111號舖

文、相、片：Kar