多媒體藝人盧覓雪（Michelle）即將推出個人品牌嘅曲奇禮盒，除咗曲奇，仲有蝴蝶酥等小吃。有睇過Michelle嘅一系列《覓食》節目，都知道Michelle同蔡瀾一樣，對食有一份追求，唔知今次自家出產嘅禮盒又有咩啱食咁呢？

問及點解Michelle會開自家品牌，佢話係因為身處台灣嘅一班朋友。「曾經有段時間喺台灣讀書，所以不時會番到台灣探望朋友，咁我成日會好煩惱唔知帶乜手信好，而市面上嘅餅乾、酥餅又未好食到可以作為香港手信咁送畀朋友，所以咪自己做咯。」

新出嘅禮盒有兩款：精裝酥餅禮盒（24件裝）($208)、精裝曲奇禮盒（20件裝）($158)，全部由位於荃灣嘅工場製成，絕對係香港製造。Michelle對食材尤其認真，單係試味就已經花咗半年時間。最終與師傅多番討論後嚴選出得到AOP認證嘅法國高質牛油，夠香氣又唔太感膩。

先介紹精裝酥餅禮盒，入面有女生大愛嘅原味蝴蝶酥、芝麻蝴蝶酥及杏仁酥條3款口味。大廚將牛油均勻地加入麵糰中，放入雪櫃雪至硬身後再加入砂糖調味，然後就可以摺出好似心形嘅蝴蝶酥，並切成一塊塊，分3段溫度去烘焗而成，做法相當繁複。

原味蝴蝶酥烘得金黃，每層嘅酥皮層次分明，味道微甜又好鬆脆，好食！而且食完不太覺油膩，唔會食多兩塊就好有飽滯感。而芝麻蝴蝶酥更多一份芝麻香，配埋鬆脆口感，猶勝原味，絕對要試！

杏仁酥條嘅做法同蝴蝶酥差不多，口感亦同樣酥脆，不過面層再有一粒粒美國杏仁片，令酥條更有咬口。

至於精裝曲奇禮盒，入面有原味、提子、蜜餞橙皮、五穀籽及紅莓燕麥5款，口味都幾特別喎！

Michelle大力推介提子曲奇，選用美國珍寶青提子，著重經烘焗後嘅提子依然保持濕潤，口感仲有微微軟身而並非烘得好乾身。

紅莓燕麥曲奇（左）以全麥粉調配，充滿麥香，加埋微酸嘅紅莓，口感帶點小清新；五穀籽曲奇（右）口感不一，可balance番曲奇嘅甜味，而且有營養，食幾多都唔會有罪惡感。

「覓食傳承」曲奇將於4月21日起喺CitySuper開售，遲下更可能推出冷泡茶系列、薩其馬等產品，想食嘅粉絲們要留意喇！

文：Joy