仲記唔記得半年前尖沙咀有間專賣Shake Shake薯條嘅新店呢？最近佢地去到太子開分店，仲推出新口味同新產品，包括賣相青咇咇但食落夠刺激嘅Wasabi薯條，同拉絲效果極誘人嘅芝士條！
 

兩款薯條新口味同芝士條即日起喺Potato Corner 尖沙咀同太子新店同步推出，開飯仔覺得當中最值得推介嘅係趣怪Wasabi，即係芥辣蛋黃醬口味。新鮮炸好嘅薯條經過店員人手Shake過後，調味粉分佈夠哂均勻。見到顏色青咇咇咁有少少卻步？實則聞落完全唔刺鼻，食落有Wasabi嘅辣味但唔會過分嗆喉，辣辣地幾刺激，食下食下仲會有種上癮嘅感覺！
 

另一新登場口味係奶油芝士，顧名思義即係將店裡面兩大皇牌口味芝士同奶油洋蔥嚟個Mix & Match，聞落有芝士香，食落就帶奶油酸味，自私食都唔會覺得太膩。兩款新味都係期間限定，大概喺兩至三個月之後就會換成其他口味，想試嘅朋友仔記得把握機會。
 

而同樣係新推出嘅芝士條亦係店裡面新鮮即炸，可以配一款調味粉。因為芝士條用嘅係Mozzarella Cheese，熱辣辣炸起嘅時候可以拉到好長！不過芝士味道就唔太重，建議配返燒烤味嘅調味粉，咁就食落夠惹味，又享受到芝士軟滑嘅口感啦。
 

餐廳仲預告埋，聖誕前後會推出香港限定口味！而喺推出限定口味前仲會推出幾款特飲，以後大家大可以一手薯條一手飲品，咁就唔會食到口渴啦。而且太子新店嘅枱特別設有叉電設備，iPhone線有、Android線有，甚至連無線叉電都有。唔單止有美食幫個人叉電，連部電話都可以叉叉電呀。
 

Potato Corner
太子太子道西157號別樹華軒地下15號舖

文、相、片：Cathy