「冰室」原指南粵一種主要賣冷飲、雪糕同沙冰等凍飲嘅食肆，後來傳到香港，揉合本地文化，賣埋三文治、多士呢類小食，其後仲有奶茶、菠蘿油、公仔麵供應，成為本土特色。喺五、六十年代開到成行成巿，盛極一時，後嚟漸漸轉型成茶餐廳，多間冰室陸續結業。直至近年潮流興懷舊，於是打住「懷舊冰室」名號開設嘅餐廳又一窩蜂咁湧現。但有幾多間真係經歷時間洗禮、承載住堅持嘅老冰室？
最經典冰室 美都餐室
美都餐室絕對係香港現存最耐歷史嘅冰室，自1950年至今已經開業69年，店內馬賽克瓷磚、吊扇、綠色百葉窗同彩色玻璃都得以保留，呈現冰室最經典舊式格局嘅模樣。多年嚟餐牌選擇都不變，招牌菜式包括焗排骨飯、焗豬扒飯、錦鹵雲吞、紅荳蓮子冰、西多士等。焗排骨飯以鐵盤上菜，大大塊排骨同炒飯上面淋滿一層厚厚茄醬，烤焗後番茄味濃郁。不過可惜，餐廳近年被食客認為水準有下降之嫌。
1959年開業嘅永香冰室有60年歷史，舖面大大個「出㱺麵飽」字樣、幾何三色地磚、吊扇、維他奶掛鐘同紙皮石牆身呈現舊式冰室經典面貌。提供咖啡、奶茶、三文治、多士同公仔麵等冰室經典食物，另外仲有坊間較少見嘅窩蛋多士，溏心蛋漿流滿多士面，非常香口。
招牌手刨紅豆冰 廣成冰室
經歷半世紀之久嘅舊冰室，手刨紅豆冰係呢度招牌作，唔少人幾遠都要去到上水就為咗呢啖冰。採用光潤亮麗、大細均勻嘅天津紅豆，花奶下面落足兩大羹，三角冰倒插蓮花杯入面，好似座冰山咁畀人慢慢剉嚟食。呢度餐牌幾十年不變，鮮油餐包、蛋治、牛肉奄列、滾水蛋等經典冰室美食仍然保留，係好多街坊嘅集體回憶。冰室懷舊感滿滿，吊扇、卡位、白瓷磚同懷舊粉綠牆成為大家嘅朝聖目標。
金牌菠蘿油 金華冰廳
呢度嘅菠蘿包曾被譽為全港NO.1！冰廳喺1973年開業，至今已經46年，堅持由師傅人手製作麵包，餐包以天然酵母自行發酵，大大個包身飽滿鬆化，外皮香甜酥脆，中間再夾塊又凍又厚嘅牛油，絕對係港人最愛，唔夾牛油轉夾鹹牛肉炒蛋都一樣得。近年多咗唔少遊客幫襯，買包客人源源不絕。
電影取景勝地 中國冰室
保留50、60年代冰室原型嘅中國冰室，1963年開業至今，有56年嘅歷史。分上下兩層、白吊扇、高背卡位、市政事務署「隨地吐痰得人憎」… … 電影迷對呢間冰室絕對唔陌生，電影《迷離夜》、《PTU》、《新不了情》、《旺角揸Fit人》都曾經喺度取景。由炒粉麵飯、西多士、三文治、蛋撻、通粉樣樣齊，當中炸雞翼、炸雞髀以油鑊生炸至金黄脆口，非常受歡迎。另外，蝴蝶酥、鴛鴦冰、甚至後生仔女未必聽過嘅舊式鳳凰奶糊同杏仁蛋糊都有提供，懷舊味十足。
文：Kenna