喂，上環有靚雞，各位咪心邪呀，我係講緊上環有間新開烤雞店，賣嘅係健康無激素嘅烤雞，吸引咗好多做gym嘅大隻仔、肌肉幫襯。有乜健康烤雞咁巴閉先？（召集女生們去打躉！）

餐廳總廚兼老闆Danielle擁有18年烹調經驗，曾經與名廚David Boulud、Gordon Ramsay合作，以往主力幫人開餐廳，今次點解想自己做老闆餐廳呢？「其實一直都想開自己的餐廳，只係未諗到做咩菜式。有次我去澳洲放假時曾走入一間烤雞店，令我覺得用「雞」做主打可煮出更多不同風格、味道嘅菜式，變化亦較大」一年後，餐廳今日正式開業。

Danielle嚴選不含激素嘅澳洲走地雞，重量約1.3公斤，自由放養令雞隻肌肉富有彈性，而且調味、醃料亦非常簡單，令食客嚐到雞肉嘅原始味道。

餐廳主要供應烤雞、炸雞兩種。Danielle先將鹽水打入雞隻中，並浸約12個鐘頭，為雞肉調味之餘，亦令雞肉不會烤得太乾身。然後再將雞吊起，放入烤爐，一邊燒，一邊旋轉，令雞肉可平均受熱。烤約1個鐘就出爐，每一輪最多可烤24隻雞。

新鮮出爐嘅烤雞香氣十足，雞皮薄，油分不多，但雞肉依然嫩滑多汁，非常出色。烤雞分四分一、半隻、1隻、無骨雞扒4款，另可配薯條、superfood組成套餐。薯條嘅調味亦殊不簡單，雞鹽購自澳洲，以雞皮、大蒜粉、辣椒粉等而成，無味精兼gluten-free。

柯打烤雞會額外跟送1款自家製醬料，有是拉差蛋黃醬、大蒜蛋黃醬、辣椒番茄醬及用雞骨烤完再磨粉而成嘅gravy。開飯仔私心推介gravy，雞味更濃郁。

DG’s Chicken & Waffle($110)配一大片窩夫、幾塊炸雞、是拉差蛋黃醬及楓糖漿。Danielle會將一塊塊無骨雞扒蘸少許香草，再上一層薄薄炸粉後去炸。香草減輕炸雞嘅油分，口感更light。

The Heisenberg($90)漢堡由炸雞、車打芝士、酸瓜、大蒜蛋黃醬等而成，香脆又清爽，味道、層次亦好豐富。

除咗烤雞、炸雞，另有幾款superfood素食，好似Banging Beets($55)，由羽衣甘藍、紅菜頭、腰果、橙及檸檬蜜糖醋組成。

整店設計摩登，門口放置幾個室外座位，感覺舒適。最好型係牆上「有鳥到」嘅霓虹燈牌，設計師取其諧音，希望令客人覺得調呢度食物「有料到」，好有諧趣。

Little Birdy
地址：上環新街16-17號地下

文：Joy