好多人食串燒都中意去居酒屋，貪佢氣氛夠哂地道，但有無體驗過喺高層大廈、望住個城市景食返串串燒咁呢？銅鑼灣最近開咗間中高檔嘅日式串燒店，串燒以雞類為主打，裝修風格現代感為主，仲有埋戶外區域同VIP房！
串燒由日藉主廚Hiroyuki Itaba主理，佢話揀雞串燒做主打因為自己曾經喺日本多間正宗日式雞肉串燒店做過，希望可以將最正宗嘅味道帶比大家。
雞肉串燒嘅雞全部都用咗鹿兒島赤雞，呢隻雞嘅程度係可以用嚟做雞刺身。燒雞腿肉同大蔥雞腿肉雞味重，雞肉質地軟硬適中，好有咬口。如果想惹味啲可以點埋依款特製蒜油汁，加咗蒜蓉、鰹魚同埋唔同款嘅油，食落有少少似中式嘅XO醬。
免治雞肉球加入韭菜、洋蔥同免治鹿兒島赤雞肉製成，食落有淡淡韭菜香氣。燒雞腎鹽香味重得嚟唔會太鹹，而且燒到好香脆，送酒真係一流！
更多【新店直擊】： |
另外仲有加大嘅XXL 燒雞翼，雞翼有成隻手掌咁大，外皮燒到金黃色，一咬落去肉汁咇哂出嚟！
Itaba主廚親自調製嘅秘制醬汁，味道甜甜地，呢款汁足足有35年歷史，入面加咗豉油、糖、味琳、日本清酒同埋一隻全雞去熬出嚟。
如果太多選擇唔知點揀好，亦都可以揀廚師發辨，由Itaba主廚親自為你決定食咩，價錢由$480-$880不等。
如果一班朋友嚟想有私人空間，仲可以訂VIP房，師傅會入埋嚟喺你面前燒，又可以同朋友傾計，簡直係一舉兩得！
地址: 銅鑼灣登龍街1-29號金朝陽中心2期Midtown26樓
文、相、片：Yanica