冬天果然係士多啤梨嘅季節，而講到士多啤梨當然唔少得日本福岡頂級士多啤梨品種「甜王AMAOU」！今次福岡縣同香港三間日本餐廳合作，推出一系列用甜王士多啤梨同「八女茶」製作嘅甜品同飲品。無論想係自私食士多啤梨忌廉包，定同另一半嘆士多啤梨下午茶都得！
 

福岡縣首次同日本老店八天堂、辻利茶舗，以及當代料理餐廳URA Japanese Delicacy合作，即日起至2月中旬推出期間限定甜王AMAOU士多啤梨同福岡八女茶甜品同飲品。甜王AMAOU之所以享負盛名，係因為佢鮮紅色同圓潤飽滿嘅賣相，更因為佢平均高達13度嘅甜度！另一方面福岡八女茶亦係綠茶當中嘅上品，特別係「玉露」更加茶香濃厚。
 

八天堂　必食甜王忌廉包+二人前下午茶

情人節限定八天堂甜王忌廉包（$32）

日本最人氣嘅季節限定口味之一，香港嘅朋友仔都食得到啦！忌廉包係八天堂嘅招牌，鬆軟可口甜而不膩。而新口味就喺忌廉當中再擠入足50克甜王士多啤梨果醬，香甜而不失輕盈口感。加上士多啤梨造型包裝，一定要相機先食呀。
 

精選情人節限定甜王士多啤梨下午茶（2人份）（$198）

而另一焦點就係香港八天堂首次推出嘅下午茶，當中包括新鮮甜王士多啤梨、甜王果醬忌廉鬆餅、甜王忌廉卷蛋同甜王果醬忌廉多士，以日式風格呈現精緻Tea Set。情人節去食就夠哂Sweet啦。
 

甜王忌廉卷蛋（$238/卷，$58/件）

甜王果醬忌廉鬆餅（$88/4件）

甜王果醬忌廉多士（$42）

下午茶當中嘅甜品亦可以單買，卷蛋同多士勝在食到新鮮甜王士多啤梨。而甜王果醬忌廉鬆餅就同忌廉包一樣，裡面有鮮忌廉同甜王士多啤梨果醬。
 

甜王梳打特飲（$58）

福岡八女玉露（$38）

有甜品之餘亦有飲品，甜王梳打特飲主要由梳打汽水、甜王士多啤梨同果醬製成，搞勻後啖啖香甜又有Sparkling口感。而福岡八女玉露選用頂級「玉露」品種，飲落有一陣綠茶嘅特別鮮味，甘甜而唔苦澀。
 

辻利茶舗　分店限定甜王芭菲

甜王芭菲（$88）

而辻利嘅甜品選擇比較少，暫時只有觀塘apm店限定嘅甜王芭菲同中環ifc店限定嘅IFC戀人窩夫。甜王芭菲裡面會有雲呢拿雪糕、米通、甜王士多啤梨果肉、威化餅碎同甜王士多啤梨果醬，層次豐富。飲品方面就同八天堂一樣會有甜王梳打特飲（$58）同福岡八女玉露（$38）。
 

URA Japanese Delicacy　獨家甜王啤酒特飲

甜王法式雞蛋布甸（$98）

最後上環呢間日本當代料理餐廳就有一款甜品同三款飲品，甜王法式雞蛋布甸主角係充滿焦糖香味嘅軟滑雞蛋布甸，加上甜王士多啤梨同鮮忌廉之後更添甜蜜。
 

甜王啤酒特飲（$80）

比較特別嘅仲有呢杯用甜王士多啤梨同日本啤酒混合而成嘅雞尾酒，清爽嘅啤酒同香甜嘅士多啤梨果醬估唔到又幾夾，應該對唔少女孩子嚟講都係非常容易入口。另外兩款飲品分別係甜王梳打特飲（$58）同福岡八女玉露（$38）。
 

文、相、片：Cathy