呢間主打新加坡肉骨茶嘅餐廳，最近見天氣涼咗，限定推出馬來西亞藥膳黑肉骨茶！肉骨茶分新加坡、馬來西亞兩種口味，新加坡肉骨茶以胡椒為主，湯色偏白，味道偏辣；馬來西亞肉骨茶則以藥膳為主，湯色偏深，味道雖然不太辣，但有濃濃嘅藥材湯香。香港比較常見嘅就係馬來西亞肉骨茶喇！

新出嘅藥膳黑肉骨茶，入面有唐排、五花肉、金菇、豆卜等配料。一上枱就聞到好勁藥材味，味道亦好濃，仲有啲回甘添！另跟一碗白飯、調味碟及古月茶。

餐廳用豬肉嘅唐排、五花肉部位，唐排爽口，五花肉軟腍，兩個部位口感完全不同，增加肉骨茶嘅層次。

湯色好似豉油咁深色，係馬來西亞肉骨茶嘅特色。美中不足嘅係，藥膳黑肉骨茶不設加湯，鍾意飲湯嘅客人可能會覺得唔夠喉。

最正係每碗有原個蒜頭，係完完整整一大個，煲得好腍身。老闆之一嘅Lico表示，正宗嘅馬來西亞肉骨茶其實會落原個蒜頭，不過喺香港售賣肉骨茶嘅舖頭為咗節省成本，通常只落幾粒蒜頭。蒜頭經熬煮幾個鐘頭後變得好腍，夾埋豬肉一齊食就更好味。

湯底加入當歸、熟地、杞子、甘草、丁香、八角、玉竹、黨參、桂皮等多種藥材去熬煮而成，因為味道夠濃，豬肉亦好入味。

從味道中可食出，餐廳好注重食物品質，用嘅豬肉每日新鮮送抵餐廳，而且食物中不含味精架！

肉骨茶跟送甜豉油連辣椒，同埋油炸鬼。

歎完肉骨茶之後，再飲番杯古月茶清一清就完滿啦！茶款不時轉換，採訪當日為烏龍茶。

餐廳皇牌！招牌新加坡肉骨茶

介紹番餐廳招牌肉骨茶，賣相的確同我哋平日常見嘅「黑媽媽」肉骨茶好唔同。餐廳用豬面頰部位，肉質軟腍啲，但亦有少許筋嘅咀嚼口感。另外再加入胡椒、蒜頭等材料煮成。另有唐排肉骨茶，豬肉偏瘦，適合怕肥又為食嘅女生。

湯色較淺，味道較為辛辣，胡椒味好濃。而且餐廳可無限加湯，yummy！

除咗白飯，客人仲可以選擇跟米粉架，口感light啲！

餐廳牆壁上畫咗幾個盞鬼嘅圖案，好盞鬼。

古月
地址：北角錦屏街後街29號A舖地下

文：Joy