品蟹嘅季節又嚟啦，想食得過癮嘅梗係要食自助餐！今期搜羅咗幾間以海鮮及蟹為主題buffet畀大家，睇吓邊間啱心水～

目錄

和牛．蟹秋「逸」海陸饗宴自助餐  Alva House 

如果你係牛魔王兼海鮮控呢間就啱晒你～嚴選高級澳洲和牛及來自加拿大鮮之味螃蟹製作一系列菜式，首推鐵板和牛薄燒，入口係滿滿嘅牛脂香，肉質好軟腍；紅酒燴和牛面肉以低溫慢火炆成，含豐富骨膠原，紅酒燒汁香濃惹味。蟹肉菜式都好吸睛，如黃金蟹選用肉鮮膏豐嘅膏蟹加埋鹹蛋黃拌炒而成，鹹鹹香香；花膠蟹肉海王羮用上原隻雞及火腿等熬煮湯頭，加入鮮蝦、鮮拆蟹肉、乾瑤柱絲、新鮮帶子粒及花膠等多款海鮮烹調而成，好鮮甜呀。另外當然唔少得日式鐵板燒、爐端燒、天婦羅、即開生蠔及冰鎮龍蝦等美食啦～

供應時間：即日起至 2024 年 1 月 1 日

「生蠔.蟹腳.龍蝦」自助晚餐  尚廚 

大家最關注嘅冰鎮海鮮區，除咗常見嘅刺身、青口、黃金螺、白蜆及凍蝦等，仲有即開生蠔同松葉蟹腳呀！新鮮又鮮甜。芝士焗龍蝦新鮮即焗，肉質鮮嫩多汁彈牙，芝士香濃恰到好處唔會蓋過龍蝦鮮味。即切烤肉區嘅香草烤黑毛豬腩卷都值得一試，以迷迭香、百里香、鼠尾草等香草醃製後紮成卷狀後烤製六小時，皮脆肉嫩。Highlight 仲有呢個抹茶主題甜品放題，包括迷你抹茶葡式蛋撻、草莓抹茶忌廉卷、抹茶紅豆慕絲蛋糕及抹茶雙重芝士蛋糕，抹茶控 Ready 好未？

供應時間：即日起至餐廳另行通知為止

環球海鮮饗宴嚐鮮自助晚餐  大灣咖啡廳 

呢間酒店就以唔同嘅海鮮為主題，款款都精心製作好有誠意。首先有酸橘汁醃帶子，帶子薄片搭配鹹香嘅三文魚籽及酸橘汁，夠晒開胃。星期五至日及公眾假期更會供應龍蝦、皇帝蟹及現場即劏原條黃鰭吞拿魚表演，黃鰭吞拿魚肉質嫩滑細膩，味道鮮美並帶濃郁油香。一系列嘅海鮮主菜都好吸引，石鍋龍蝦湯泡飯以爽彈鮮甜嘅龍蝦身及龍蝦殼熬製，飯粒吸收晒龍蝦湯精華，鮮味滿滿。另外仲有自選海鮮粥、金銀蒜粉絲蒸貴妃蚌、黃金大蝦及豉椒炒蜆等菜式，海鮮 Fans 一定唔會失望。

供應時間：即日起至 2023 年 11 月 30 日

蟹蠔饗宴自助晚餐  City Café 

餐廳以多款靚蟹及鮮蠔食材，炮製呢個超豐盛嘅「蟹蠔饗宴」自助晚餐！每位客人可獲贈「沖繩岩鹽照燒雪花蟹腳伴日式柚子醋汁」一客，大廚將阿拉斯加皇后蟹腳加入蒜蓉牛油等調味料炒香，味道鮮甜並帶有淡淡海水鹹味，配合柚子醋汁食好清新。日本廣島生蠔天婦羅配黑松露沙律醬即叫即炸，蠔肉飽滿多汁，香口卻唔油膩，配埋黑松露沙律醬真係完美。仲有炙燒芝士蟹籽廣島生蠔、潮式迷你鮮蠔仔餅、金箔法式蟹肉燉蛋及黃金蟹粉蝦多士等都值得一試呀。

供應時間：即日至 2023 年 10 月 31 日

「蟹」趣無窮自助餐  Essence

10 月正係蟹類黃多油滿之時，呢間餐廳就乘勢推出 「蟹」趣無窮自助餐～大廚搜羅咗嚟自世界各地唔同地方嘅蟹為大家炮製多款菜式，如法國麵包蟹及泰國加菲蟹。想食返蟹肉最鮮嘅味道必試清蒸大閘蟹，新加坡黑胡椒炒美國珍寶蟹以其鮮嫩同厚實嘅肉質而聞名，用黑胡椒猛火快炒，香濃惹味。另有焗釀越南藍花蟹蓋、蟹黃擔擔麵、墨西哥辣蟹沙律夾餅及酥皮焗蟹肉周打湯，蟹迷不容錯過！

供應時間：即日起至 2023 年 11 月 30 日

「秋色嘗蟹」自助晚餐  御花園咖啡室 

一樣以蟹為主題嘅 Buffet，首先每人一份迎賓開胃菜：泰式咖哩南瓜軟殼蟹。然後盡情享用無限量供應嘅長腳蟹蟹腳、英國麵包蟹及芒果長腳蟹肉沙律等前菜。推介花雕酒蛋白蒸蟹，用純粹嘅蛋白及花雕酒烹調，完美地保留螃蟹鮮甜，蛋白嘅酒香同蟹香十足，質感好似布甸咁嫩滑。亮點菜餚仲有避風塘炒蟹、蟹粉伴脆米餅、荷葉蒸蟹飯及焗蟹肉海鮮杯等；即場新鮮熬煮嘅鮮蟹粥都不可錯過！

供應時間：即日起至 2023 年 11 月 30 日

文: Yanica