老實講，嚟到夏天要去無冷氣嘅地方食飯係辛苦少少，元朗大棠道熟食市場呢度仲要係傳統「冬菇亭」。但嚟到就會發現有唔少街坊推介美食，從香噴噴蒸飯到透薄手拉腸粉，足料港式粉麵到大牌檔唔少得嘅鑊氣小炒呢度都搵得到。不過記得注意檔口營業時間，唔係嚟到無得食「好西」變食白果就唔好啦。
 

老友記最愛原盅蒸飯　　大良泗記

圖：rollingpanda

平時去飲茶通常點心係主角，蒸飯只係飽肚用嘅配角，但嚟到呢度就完全相反，一碗碗原盅蒸飯先係每枱必嗌嘅招牌菜！想食鳳爪排骨得，鹹魚肉片亦得，其實重點係個靚仔，即係白飯，吸收咗肉汁再加上甜豉油，攪均之後香氣四溢粒粒分明。特別推介梅菜排骨飯，梅菜係自家醃製，同時具備鹹香同甜香，排骨肉質食落亦夠鬆軟。
 

滑溜半透明手拉腸粉　　小桃苑粥麵

圖：井底龜龜

其實呢間檔口嘅粥底都相當唔錯而且用料亦足，但更出色嘅係佢地即叫即製嘅手拉腸粉！一樣餡料有鮮蝦、叉燒、牛肉、豬潤、甚至近年已經少見嘅雞蛋腸粉，但亮點始終係米白而軟滑嘅腸粉。鐘意食香口嘢嘅朋友仔亦可以嗌炸兩，滑溜腸粉同脆口油炸鬼加埋甜、辣同麻醬食落口真係無得輸。
 

真材實料牛腩雲吞麵　　鄭洪記

圖：井底龜龜

可以食到碗用心煮嘅港式粉麵，其實就已經係唔少香港人嘅Comfort Food。呢間粉麵檔勝在用料考究又有誠意，潮式牛腩用新鮮牛腩加花椒、八角、桂皮等香料滷過晚，入味又唔過肥。雲吞亦係老闆每日新鮮包，蝦肉同豬肉比例得宜，加埋木耳絲同大地魚粉，包成有金魚尾嘅鮮味雲吞。仲可以買埋佢地嘅自家炸魚皮返屋企，金黃香脆。
 

晚市鑊氣小炒大牌檔　　輝記大排檔

圖：~Snoopy~

朝早嚟食過蒸飯，夜晚就可以轉場嚟呢度食鑊氣小炒送飯或者送啤酒！薑蔥霸王雞嘅重點其實唔係隻雞或者下面嘅豉油，而係上面鋪滿嘅芫荽蔥花。唔食芫荽嘅朋友仔亦可以食招牌鹽焗雞，雞肉嫩滑唔死鹹。小炒王同菠蘿生炒排骨等有火候又惹味，想送啤酒亦有黃金白飯魚、脆皮炸大腸同鹹蛋黃炒海蝦等香口嘢，任君選擇。

文：Cathy