香港嘅夏天點少得一杯清新茶飲？中環呢間新開嘅飲品店主打選用優質原片茶葉，保留茶嘅清香而去除澀味，想貪心啲嘅話可以選擇唔同時令水果同芝士奶蓋，配搭出屬於你嘅消暑滋味。
 

位於中環擺花街嘅Tea Library旨在提供一個好似圖書館咁寧靜舒適嘅環境，畀大家停落嚟好好品茶。而店名另一個意思係希望做到好似一個茶嘅圖書館，為大家介紹唔同茶嘅特色。4款主打中式茶嚟自中國福建同雲南，用經過精挑細選嘅原片茶葉，茶香同餘韻都各有特色。而且100%採用新鮮水果，而唔係用果醬或者糖漿打成，自然香甜。
 

荔枝高山烏龍（$39）

高山烏龍選用春收手採茶葉，低溫烘焙加上氧化程度(60-70%)比坊間一般烏龍茶葉(80%)低，減低丹寧含量，入口口感柔滑、茶香突出。荔枝嘅甜香同烏龍嘅回甘亦相當夾。
 

白桃極品鐵觀音（$43）

粉橙色賣相非常吸引，選用澳洲或日本等地當造白桃，打成果汁再加入鐵觀音茶，甜味自然唔膩。鐵觀音茶只選春秋二造，聞落有少少蘭花香味，回甘清新而悠長。另一水果推介係芝士草莓極品鐵觀音（$48），除咗因為時令士多啤梨同鐵觀音夾之外，飲到一半將融咗嘅奶蓋搞勻飲，會有士多啤梨奶嘅感覺！
 

芝士黑朱古力珍藏普洱（$48）

普洱選用雲南珍藏25年自然發酵茶葉，特別從香港一間老字號茶莊入貨，有一陣特別嘅陳香，清潤解膩，而且完全無任何苦澀味。配搭黑朱古力最易入口，用嘅係法國Valrhona無糖朱古力粉，可可香味濃郁。加上芝士奶蓋嘅輕微鹹味同奶香帶起朱古力自然甜味，非常討好。如果想飲普洱味道重啲嘅，可以揀返無奶蓋嘅版本唷。
 

 

芝士火龍果銀毫茉莉龍珠（$48）

紫紅色賣相嚟自紅肉火龍果，果肉無完全打碎，飲落口感最豐富。入口先食到火龍果嘅微甜，之後脷底回有一陣銀毫茉莉嘅持久嘅回甘，帶少少花香同甜味，層次分明。銀毫茉莉龍珠嘅龍珠並唔係珍珠奶茶嘅珍珠，而係指將銀毫、即係帶白色茸毛嘅初生芽葉同其他春芽手卷成球型，之後仲會用茉莉花作六次窨香㗎。
 

就算平時比較少飲茶嘅朋友都可以一試，一嚟佢地選用原片優質茶葉，唔會有平時用茶碎沖茶嘅苦澀味同嚡口感。二嚟配搭嘅水果同奶蓋都有用心，例如芒果只會用纖維比較少嘅泰國水仙或者金水仙品種，蘋果用嘅係糖度達13度日本青森縣蘋果。奶蓋亦係用Cream Cheese、牛奶等打成，而唔係用奶蓋粉，略嫌口感唔夠Fuffy，但芝士香十足，建議大家最好係半個鐘之內飲完呀。
 

Tea Library
中環擺花街24號地舖

文、相、片：Cathy