冰室，或者冰廳，聽個名就已經感覺到係幾十年前嘅產物。最初最初嗰陣主要係賣凍嘢嘅，即係冷飲、雪糕、沙冰呀咁，後嚟賣下賣下就賣埋三文治同各式糕餅等，嚟到今時今日，就更加好似間茶記一樣，咩都有得食。紅磡最近新開咗間咗冰室menu上好多嘢食，但最吸引嘅一定係龍蝦鮑魚籠仔蒸飯，而喺下午茶時段仲提供多款極懷舊食品！

大大個蒸籠，一打開就不得了！係龍蝦鮑魚籠仔蒸飯呀。又鮑魚、又龍蝦，鋪滿晒成個籠，兼且啲海鮮仲要係老闆每日去附近街巿新鮮買返嚟嘅，即叫即蒸，鮮味十足！另外用上蒜蓉爆香，又用荷葉包住啲飯，令到成件事更加惹味。不過就只係得晚巿先有得食，每日限量6份添咋，想食就最好早啲預訂定一份嚕~

除咗一般小炒好似咕嚕肉呀、炒牛肉呀等之外，另一樣晚巿必食嘅應該就係呢道香烤豬手。外皮脆卜卜，豬手肉嫩香，叫返杯啤酒食係幾爽歪歪嘅。

至於懷舊嘅朋友仔，就最好喺下午茶時段去啦，事關佢哋有一系列懷舊食品呀，不過懷舊得嚟亦有注入新元素嘅。例如好似特製菠蘿包咁，就將菠蘿包同鹹牛肉包溝埋一齊，再加埋芝士、洋蔥、蕃茄炒蛋，一啖咬落去口感好豐富，麵包輕輕烘過亦變得脆口。

年輕嘅朋友仔唔知有冇食過焗蝦多士？而家好少地方有喇，而且傳統嘅多數都係油炸，比較油膩。呢度就轉用焗嘅方法，方包亦換咗做法包，使口感更加香脆。至於蝦嘅部分，係混合咗鮮蝦同蝦膠，有嚼勁中又帶有蝦肉香。

西多士雖然好邪惡，但長期都係香港人嘅飛佛。呢度嘅「金磚四角」即係西多，不過就切咗四份先再炸，咁就塊塊都有脆脆der邊邊食到。四款口味選擇包括有花生醬。朱古力、咖央同果占。

吞蛋厚多士切開會有緩緩流心效果，係半熟蛋加鹹芝士啊，但你以為係鹹咩？Sor，係甜㗎！典解嘅？原來仲混入咗經過自家調製嘅酸甜吞拿魚，又幾特別。

要幾懷舊有幾懷舊！連幾乎絕跡嘅懷舊滾水蛋都有登場嘅機會！新生代應該好少有機會食過喇，真係就咁一杯滾水，就打隻蛋落去，攪勻嚟飲，就飲到啲蛋香啦。

1仔冰室
地址：紅磡必嘉街92-112號紅磡灣中心地下9C號舖

文、相、片：Kar