喂喂喂！真係開喇！紐約人氣街頭漢堡Shake Shack真係開舖喇！之前快閃一日pop up排唔到隊食唔到包嘅fans，機會又再嚟喇飛雲！

官方宣佈咗，5月1號就會正式開舖喇，經典嘅招牌漢堡、薯條當然有得食啦，仲有啲係得香港先有嘅menu呀！即刻睇睇！

Concrete，即係frozen custard呢，本身都有朱古力味嘅，入面仲有brownies，口感一軟一硬係nice嘅。嚟到香港，餐廳特地推出咗幾款係得香港先有嘅口味，全部都係med埋香港地道美食㗎，包括：HK Style concrete（雲呢拿custard、西多士、花生醬、香蕉，面層淋楓糖漿）、The Heart & Tart of Central concrete（雲呢拿custard、蛋撻、士多啤梨蓉）同埋That’s My Jam concrete（雲呢拿custard、Jam Story芒果熱情果果醬、新鮮覆盆子、酥餅碎塊），都真係好有香港風味下！

仲有杯Milk Tea Shake都係得香港店獨有㗎，係雲呢拿 frozen custard混埋黑茶沖調嘅，飲落甜甜地。

至於經典漢堡，講過幾次，大家應該都好熟悉啦。用全天然安格斯牛肉做嘅扒，配生菜、蕃茄、自製ShackSauce就製成一個招牌芝士漢堡（ShakeBurger），肉味係幾香濃嘅。

另外仲有個炸雞堡（Chick’n Shack），個香草mayo醬又幾香，但塊雞肉就略略乾咗少少。

講到最吸引，開飯仔依然都係推介Shroom Burger，鮮炸原隻大啡菇流心芝士漢堡！呢個一定一定要趁熱食，個菇好juicy，重點係喺中間嗰啲明斯特同車打芝士呀！半溶狀態，做到超長拉絲效果呀！同埋個菇炸得好脆口~~

有漢堡點可以冇薯條？係波浪紋㗎，邊邊好脆。唔怕肥仔嘅，建議選配埋特製車打及美國芝士醬，咁先夠香口！

至於熱狗，都係用100%全天然牛肉腸製嘅，冇添加激素，冇抗生素，條腸係燒得香嘅，夾埋酸瓜、蕃茄、洋蔥等配料，但都係dry dry地嘅感覺。

飲品方面，汽水走唔甩啦，另外仲有之前同大家介紹過嘅，同紐約Brooklyn Brewery合作研製嘅ShackMeister Ale手工啤，清新，微甘；一系列本地手工啤酒，好似少爺、門神、Heroes、鬼佬等都有，有啲係on tap，有啲係支/罐裝。唔想飲啤酒嘅，紅、白酒都有！

Shake Shack
地址：中環港景街1號國際金融中心4樓4018號舖
開店日期：5月1日

文、相：Kar