由2019等到2020，終於畀甜品控等到啦~ 嚟自紐約、風靡全球嘅甜品店Dominique Ansel聽日就喺尖沙咀開業啦~

呢間餐廳甚有來頭，主廚兼創辦人Dominique曾經榮獲世界 50 大最佳餐廳中「全球最佳甜點主廚」，過往亦曾設計過多款內外兼備嘅創意甜品，包括將牛角包同冬甩合二為一嘅Cronut®。雖然香港店冇呢個食到係有啲可惜，但亦有多款由Dominique親自設計，淨得香港度先至食得到嘅創意甜品呀！

菠蘿油、檸茶、火腿通、黑白淡奶？呢幾款充滿香港特色嘅食物，通通都變晒做甜品呀！

 菠蘿油 – 椰子熱情果蛋糕   件裝 $65/ 原個 $520

呢個「菠蘿油」，外層以椰子慕絲同椰子dacquoise 蛋糕製成，中間夾着嘅牛油則係海鹽味mascarpone 忌廉，內餡係菠蘿青檸熱情果果醬。見到係好有衝動想用手拎起成個食，不過係軟腍腍㗎，味道清新微酸。

 紙包檸檬茶 – 伯爵茶佛手柑蛋糕  件裝 $62/ 原個 $480

食得嘅紙包檸檬茶底面兩層「包裝盒」係白朱古力片，內層以伯爵茶mascarpone慕絲配佛手柑奶酪同杏仁餅等，茶味香濃，又真係有啲似檸茶喎。不過食多幾啖又有少少略甜嘅感覺。

 通心粉 - 芝士蛋糕    $58

至於放大版嘅火腿通，則係口感軟綿，芝士味濃郁嘅雙重芝士蛋糕嚟。用上fromage blanc 同 ricotta 兩種芝士作基調，再加入檸檬，所以都唔會話太膩嘅。加埋白朱古力「火腿絲」同棉花糖「紅蘿蔔」，像真度高得嚟又不失可愛。

 黑白淡奶 – 海鹽焦糖牛奶布甸    $65

打開「黑白淡奶」罐蓋，面層係海鹽焦糖味奶凍，再嗶深啲，係以冧酒浸泡過嘅蛋糕，甜中帶鹹。

 魚蛋 – 炸紅豆雪糕糯米糍$68

除咗櫥窗內嘅創意甜品，仲有啲係即叫即製嘅甜品，要數最搞鬼嘅就係呢串咖喱魚蛋啦~ 幾可亂真啊~ 竹籤拮住4粒「魚蛋」，要快食啊，入面係紅豆雪糕糯米糍嚟，外層用火槍輕燒過，外熱內冷，外層仲煙韌微脆添。

 港式奶茶曲奇杯  $48

呢個曲奇杯成樽益力多咁，不過倒入去嘅卻係奶茶，曲奇則帶有淡淡玉桂味。食嗰陣記得小心啲，呷返幾啖奶茶先好咬曲奇呀，唔到漏瀉。

 蛋卷蛋撻  $38

好多人都鍾意食嘅蛋撻，平時通常都係餅皮或酥皮，今次變咗係蛋卷皮呀！每層蛋卷都係人手卷製，層層薄脆口感又幾唔錯。

講咗咁耐，點少得餐廳嘅經典法式甜酥麵包呢？

DKA (Dominique’s Kouign Amann)  $38

特別推介DKA，外層嘅焦糖皮相當脆身，但入面又好酥化鬆軟，口感豐富，難怪喺全球每個地方都係熱賣產品。

 法式芝士梳乎厘奄列  $88

另外，呢度仲有一系列以雞蛋為主題嘅鹹點，傳統法式梳乎厘奄列，加入軟糯嘅fontina 芝士同香草，鹹香軟熟，香蔥味突出，趁熱食仲有微微拉絲添~

 棉花糖熱朱古力

當文歷餅店
地址：尖沙咀廣東道3-27號海港城海運大廈地下OT G63A號舖
開業日期：1月7日

文：Kar
相、片：Tom Li