灣仔汕頭街最近開咗間以白色為主嘅小店，唔講仲以為係Cafe，但其實係由一位來港10年嘅華裔菲律賓人主理嘅摩登菲律賓Fusion餐廳！希望將佢細細個食到嘅Comfort Food改良帶過嚟香港，好似傳統燉菜、蒜蓉飯等。記得留肚食雪糕三文治，自家製紫芋雪糕香甜唔膩，最啱做飯後甜品呀。
 

Holy Gaw由大廚Marvin主理，喺菲律賓宿霧長大，讀書畢業後嚟到香港，先後喺意大利餐廳Carbone同墨西哥餐廳Chino任職。最近喺灣仔開屬於自己嘅小店，主打富菲律賓特色嘅摩登Fusion菜，定價親民而且環境舒適，感覺Cozy。
 

MOO ‘Salpicao’ Cauliflower Rice（$108）

主角牛柳鮮嫩多汁，肉香配搭炸蒜片食落更惹味。秘製醬汁特別落咗柑橘，平衡牛肉嘅油膩感。Marvin更將菲律賓嘅蒜蓉炒飯改為更健康嘅蒜蓉炒椰菜花碎，再按香港人口味減少蒜蓉分量，食落係一粒粒爽口嘅口感加上蒜蓉香，再撈埋醬汁一齊食就更香口！
 

HERBY ‘Peanut Stew’ Cauliflower Rice（$88）

花生燉菜嘅靈感嚟自菲律賓傳統燉菜Kare-kare，望落顏色似咖喱但完全唔辣。用咗花生、多款香料包括胭脂樹紅，加埋時令蔬菜一齊燉煮，無論聞落定食落都有好濃郁嘅花生香味！帶花生顆粒感嘅鹹香醬汁配蔬菜同椰菜花飯都好夾，特別係烤茄子同粟米仔呀。
 

MEATBALL Bolognese（$108）

肉丸用新鮮豬肉加上番茜、洋蔥、紫蘇葉等材料每日手打而成，所以口感鬆軟得嚟又唔會散開，微微豬肉甜味同香草香氣好夾。配搭蕃茄醬汁、芝士食落酸酸甜甜咁，寬麵掛醬程度亦得宜。
 

 

ICE-CREAM Sandwich（$48）

唔少Foodie嘅推介就係呢份ICE-CREAM Sandwich，中間紫色嘅係用紫芋醬同忌廉自家製作嘅紫芋雪糕，口感Creamy得嚟仲食到少少芋肉，芋香突出而且唔會太甜。外面綠色嘅係自家製Pandesal，係一種菲律賓餐包，柔軟微甜，而且比一般喺香港食到嘅餐包更濕潤。再加上烤開心果碎點綴，味道同口感層次都好豐富。
 

Soda（$18）

青檸梳打唔單止有漸層賣相，氣泡口感加上酸味感覺好開胃。另外仲有Sangria、Cocktails、House Wine等。
 

Beer（$58）

想特別啲可以揀菲律賓啤酒，口感溫順味道甘甜，不過酒精濃度亦比一般啤酒高，有8%㗎留意返。
 

Holy Gaw
地址：灣仔汕頭街15號地下4號舖

文、相：Cathy