各位肉食獸同牛魔王，對嚟自美國加州嘅經典扒房Lawry’s The Prime Rib一定唔會陌生，自從早幾個月位於和記大廈嘅舊店，因為大廈要拆卸重建而被迫結業後，日等夜等終於等到佢哋搵到新舖位，重新再營業喇！經典銀色餐車不變、即席切肉不變、切肉方法不變、大家可以去食返老味道啦。

新址位於中環嘉軒大廈頂樓，使用落地玻璃窗設計，有自然光透入，較以往環境光猛。圓拱形天花、酒紅色嘅座位，感覺高貴優雅，另有一間10人VIP房。

推住架600磅嘅銀色不鏽鋼餐車去到客人面前，即席分切牛肉，絕對係呢度嘅經典同指定動作。望住order嘅燒牛肉，一片一片咁切落嚟、淋埋汁再上枱，眼球先被餵飽。餐廳一直堅持使用獲美國農業部USDA認可、以粟米飼養嘅美國黑安格斯牛肉，大大塊但肉質依然軟腍而帶有肉香，相當juicy，邊邊位仲有微焦，係熟悉嘅味道，牛魔王表示滿足。

套餐仲配埋香滑薯蓉、英式烤薄酥餅（Yorkshire Pudding）同忌廉辣根醬，加錢仲可以加埋忌廉粟米粒同忌廉菠菜等。摩擦力強嘅朋友仔，應該會見得到碟上嘅牛肉汁同薯蓉上嘅汁係有啲唔同。前者以牛骨、雜菜等熬製，加入砵酒，令汁醬更香，點牛肉同Yorkshire Pudding都係一流；後者較杰身，加入紅酒製作，食落仲有陣陣牛肉香，配薯蓉食令到層次更為豐富，啖啖牛香。

同以往一樣，餐廳提供4種席前分切方法，分別係份量最細嘅加州薄切（對女生嚟講都已經唔算細）、英式三片切、招牌美味切，同埋重量級16安士金百帝厚切。

當然，嚟到唔止淨係得牛食嘅，羊都有。仲有湯品、沙律、甜品同各款酒類飲品等。燒幼嫩羊架羶味唔算好重，點埋紅酒汁更能帶出肉香。

以美國龍蝦尾、洋蔥、甘筍等熬製8個鐘嘅龍蝦濃湯，聚集晒各項食材嘅精華，成碗湯煲得好融啊！啖啖都係香濃嘅龍蝦味，嚿龍蝦肉仲好鮮爽添~ 飲完仲有陣餘香喺口腔中迴盪。

冰旋翡翠沙律同樣充滿視覺效果，侍應會即場喺碎冰上調製沙律，一路轉盤，一路加入自家品牌些利酒沙律醬，確保醬料滲透勻循之外，每片蔬菜都仲可以保持喺最冰凍最新鮮嘅狀態。上碟時，仲有多隻冰叉奉上，一食，wow，好有冰感，新鮮爽脆，夏天食就更加爽。加埋餐廳自家調製嘅pepper都得。

雖然食咗好多肉、好多嘢已經好飽，但依然都要留啲空間畀甜品，第二個胃嚟的嘛，有位嘅。暖朱古力蛋糕配雲呢嗱意式雪糕，望到啲好鬼澎湃嘅朱古力醬，甜魔立馬變心心眼。一個字，甜香！蛋糕非常軟熟濕潤 ，帶有微暖溫度，要盡情咁點多啲朱古力醬一齊食先至得！

Lawry’s The Prime Rib
地址：中環皇后大道中9號嘉軒廣場3樓

文：Kar
相、片：Tom Li