而家係咪排拍穿越劇？點解旺角鬧市會突然出現七八十年代Feel嘅戲院？實情呢間並唔係一間戲院，而係如假包換嘅餐廳，有懷舊蝦多士同唂咕，亦有新派阿華田脆脆西多士，估你唔到連香港人最愛嘅火鍋都有，大家可以放心嚟打卡兼醫肚。
 

火水爐冰室火鍋顧名思義，係集冰室同火鍋於一身嘅餐廳，午市茶市係冰室，晚市就做火鍋，甚有香港人嘅靈活精神。地下入口到餐廳裡面都充滿七八十年代特色：綠色鐵皮加紅色手寫字、綠白格仔紙皮石磚、舊式收音機，睇真啲手繪電影海報上面仲特別將主題改做嘢食，夠鬼馬。
 

裝修懷舊之餘嘢食亦都好似返咗去以前咁，懷舊蝦多士一碟四件，件件都有原隻蝦而且食落相當香脆，如果油膩感可以再減低啲會更討喜。不過其實亮點在於旁邊嘅醬汁，白色沙律醬由師傅特別調校，食落甜味突出，有啲似細個食港式熱狗沙律醬嘅味道呀。
 

而懷舊唂咕就更加係坊間少見，唂咕者Cocoa可可粉是也，皆因朱古力粉比較貴，所以以前嘅冰室會以可可粉嚟取代。可可香味一樣，但無朱古力咁甜，另外味道亦有啲似少甜版嘅阿華田。
 

食完懷舊菜同時亦有創新口味出場，阿華田脆脆西多士一上枱賣相就已經非常搶眼，西多士鋪滿阿華田脆脆，中間半融嘅牛油更加係「邪惡核心」。食落阿華田脆脆的確夠脆又有朱古力甜香，西多士有三層而中間係花生醬夾心，最值得讃嘅係今次西多士連四邊都炸得香脆而食落唔油膩。不過甜味主導而分量又唔細，細食嘅女士建議同朋友開心Share。
 

唔夠喉？仲有唔少飯麵選擇，好似呢碗雞髀撈一丁麵配回味雞醬撈一樣係分量十足，雞髀大大件，咬落雞皮薄而香脆，略嫌雞肉乾咗少少。而回味雞醬味道香辣，問過先知參考咗香港人另一最愛雞煲，唔怪之得食落辣得嚟又有啲食上癮嘅感覺啦。唔食得辣嘅朋友建議逐少逐少咁加落去，或者簡單啲改嗌其他撈麵醬汁。
 

晚市餐廳就會搖身一變成火鍋店，雖然唔似店名用「火水爐」而係用Gas爐，但鍋就係特別訂製圓底鋁鍋，特點係傳熱夠快，啱哂咩都要快嘅香港人吖嘛。有啲可惜嘅係暫時只有套餐供應，不過計返性價比又真係無得輸。
 

點解話抵食？開飯仔將個套餐列出嚟畀大家睇睇就知道，包括：頭盤前菜、惹味鮑魚、秘製辣雞煲、火鍋湯底、海鮮拼盤、手切本地肥牛、手切黑毛豬肉、脆炸拼盤、六寶拼丸、手包餃子雲吞、蔬菜籃、配料盤、汽水再加甜品。而且部分配料仲要係唔夠可以再免費添加，半放題形式保證各位大胃王都夠飽！
 

火鍋湯底可以四選一，但開飯仔就會建議你畀多少少錢嚟個鴛鴦湯底，因為蕃茄濃湯同沙嗲湯真係各有千秋。蕃茄濃湯唔單止有蕃茄，仲有埋隻蟹同粟米一齊煲，飲落酸甜味道自然，絕對唔係用大量茄膏開出嚟嘅行貨。而招牌沙嗲湯單係濃稠程度就已經贏咗坊間唔少火鍋店，滾起有花生香味，食落鹹鹹地辣辣地，就算係蔬菜都唔洗點任何醬汁就已經夠味。
 

配料方面亦唔出色，海鮮拼盤每日都有六款時令海鮮，今次就包括蝦、蟶子、龍躉片等等。
 

不過開飯仔更加欣賞嘅係手切本地肥牛同手切黑毛豬肉，肥牛油花多而均勻，淥多陣都唔洗怕食落會有渣。而黑毛豬肉亦切得夠薄，口感柔滑有肉香。
 

記得個胃留少少空間畀甜品，套餐甜品係懷舊雜果涼粉紅豆冰，其實主要係靠罐頭雜果同紅豆嚟帶起甜味，但自己鑿碎啲冰再加花奶食，嗰種回憶中嘅味道係會加分嘅。而老闆亦表示餐廳上咗軌道之後就會提供更多冰室美食同火鍋選擇，大家可以期待一下啦。
 

火水爐冰室火鍋
旺角煙廠街33號朗廷軒1樓

文、相、片：Cathy