聖誕節前夕總係會有好多飯局，最煩就係要諗同朋友去邊度食飯好～襯天氣涼涼地，介紹四間露天嘅餐廳酒吧畀大家，有氣氛之餘仲有得飲住嘢食好西！
多款口味藍青口 Ministry of Mussels 
中環區新開無耐嘅餐廳酒吧，佔地4000呎，有室內及露天位置。餐廳最主打係多款口味嘅藍青口，藍青口本身已經好大隻又creamy，口味方面都好有特色，例如藍芝士、新加坡辣蟹、香蒜辣椒及龍蝦味。最受歡迎係龍蝦味，龍蝦味非常突出，配埋青口真係鮮上加鮮，加入少少番茄令成道菜減少膩感，好有驚喜。Spread Your Wings and Fry都好值得試，有六至七隻超大件嘅雞翼、雞脾、雞胸，仲可以揀韓式辣味、芝士、或者Cajun，嫩滑又多汁，送酒一流！
圖: RheaChim
音樂酒吧 Terrible Baby
鍾意音樂嘅朋友一定唔可以錯過佐敦呢間酒店內嘅酒吧～室外位置放滿唔少綠色植物，猶如鬧市中嘅小綠州，喺呢度飲嘢都零舍放鬆啲。招牌飲品Siu Siu Pink以西柚味為主，味道酸酸甜甜，啱晒女士們飲。食物方面主打Angus Beef Burger及Spicy Chicken Wings，前者漢堡肉重牛味，後者惹味又多汁～而且餐廳酒吧每星期都會有live band show睇，好好氣氛～
圖: 紅棗@周圍食
日式風味酒吧 Lounge Hakuba
西式餐廳酒吧就周圍都有，相反日式露天酒吧又真係少見啲。呢間日式風味嘅酒吧由3位90後開設，以日本登山滑雪Lodge Bar為主題，可以坐喺戶外草地同朋友把酒談心，好有mood～多款獨家研製嘅cocktails，如Breakfast in the Alps係以冷泡製成嘅咖啡冧酒，再加入焙煎茶味嘅利口酒、蕎麥味糖漿等，咖啡味同酒味都好濃郁。食物方面卡邦尼烏冬都幾有人氣，掛汁而且蛋味香濃，烏冬質感彈牙有咬口；日式牛肉三文治都唔錯，牛肉生熟程度啱啱好，加埋炸洋蔥及BBQ汁，口感同味道都好rich～
圖: 世界最高酒吧 Ozone
想睇高空靚景，一定唔可以錯過呢間位於尖沙咀酒店、全世界最高嘅酒吧！裝修充滿格調，一踏出電梯就係滿滿紫色霓虹燈飾，仲有超靚嘅景觀睇，啱晒打卡。酒方面主打命為金木水火土嘅五款雞尾酒，坊間比較少機會飲到，值得一試～食物方面表現都唔錯，巴西烤牛臀排配上南美青醬，異國風味好濃厚；仲有竹葉烤鱈魚，鱈魚肉滑皮香，帶有陣彈竹葉香氣～
圖: XYTX
文: Yanica