肉食獸有肉食固然開心，如果成餐都可以放肆地無限任食就仲開心，簡直係大滿足。啱啱由扒房轉型為海鮮+肉扒嘅Porterhouse Seafood & Steak，即使新增咗多款海鮮菜式，亦冇忘記到肉食獸嘅需求，仲推出咗個無限任食豬羊牛嘅Let's Meat套餐。

Let's Meat套餐逢星期日至二嘅夜晚先有，包括湯品、冷前菜、甜品，同埋無限追加四款肉類，兩位起計，每位$598再加一，大胃王食得落，追加多幾次啲扒其實係幾抵。

龍蝦濃湯幾鮮甜同香濃，仲好creamy，如果有幾粒龍蝦肉咬下就會再開心啲。

前菜可選凱撒沙律、三文魚他他或者生牛肉他他。三文魚他他配有牛油果同洋蔥等，係小清新之選；生牛肉他他則啖啖肉香，配埋魚子醬令鹹香層次提昇。

至於主角，當然係4款可以無限追加嘅肉食：澳洲安格斯西冷牛扒或澳洲安格斯側膜橫肌牛扒、烤新西蘭羊架、烤加拿大豬扒同燉牛面頰意大利寬扁麵。一開頭會成個platter齊晒咁多款咁上，食完後就可以按個人喜好，鍾意邊啲就追加邊啲。肉扒只作簡單調味，完全可以食到原始嘅肉香，不過餐廳亦會供應幾款芥末同海鹽等調味料，想重味少少都冇問題。

逐款講下，鍾意食濃郁肉香嘅，揀澳洲安格斯西冷牛扒就冇錯；想要肉質嫩滑啲、油脂感香啲嘅就可揀澳洲安格斯側膜橫肌牛扒。烤新西蘭羊架肉色粉嫩，羊肉羶香頗重；至於烤加拿大豬扒大大塊，相當厚肉，不過厚就唔等於韌嘅，軟腍易咬，而且帶有肉香，開飯仔都幾推介。

另外，如果慣咗要有啲澱粉質落肚嘅朋友仔，燉牛面頰意大利寬扁麵都唔錯，特別係以牛汁製成嘅汁底幾濃郁，牛面頰亦夠腍身。

甜品係自家製雪糕同雪葩，每日都有唔同口味，配埋餅碎同生果，感覺亦冇咁單調。最後溫馨提示一下，呢個餐就冇包飲品嘅，但如果覺得有靚肉食要配多杯酒先至完美嘅，亦可加錢享受2小時無限暢飲。

Porterhouse - Seafood & Steak   
地址: 中環蘭桂坊德己立街30-32號加州大廈7樓