全新Farm-to-Burger漢堡品牌最近喺灣仔開設第一間分店，由位於澳洲嘅自家牧場直送100%全天然安格斯牛肉，確保漢堡質素。加上廚師精心設計嘅特色醬汁，同選用天然酵母嘅酸種麵包，加倍滋味。特別係經典漢堡配三重蒜蓉醬，蒜香十足！
 

澳洲自家牧場 直送高質安格斯牛肉

（左）品牌澳洲自家牧場（餐廳提供照片），（右）每塊牛肉都有一定厚度

N+ Burger首店坐落於灣仔汕頭街，墨綠色門面好易認，店高兩層有足夠空間感。品牌最大賣點係牛肉嚟自獨有自家牧場，牧場繁育嘅主要係純種黑安格斯牛，品質有保證。餐廳提供4oz或6oz嘅安格斯牛肉或牛腩肉，煎嘅時候每塊都有一定厚度以保留肉汁。連麵包都特別用天然酵母製作成口感鬆軟有彈性嘅酸種麵包，加上牛油烤過濕潤度啱啱好。
 

自選秘製醬汁 打開漢堡無限可能性

N+ Classics with N+ Garlic（$75）

店名N+ Burger當中嘅N借用數學以N取代未知數嘅概念，比喻餐廳致力為食客帶嚟味覺上嘅無限可能性。其中一個心思之處係醬汁，經典漢堡現時有原味、三重蒜蓉醬同千島醬三款選擇。三重蒜蓉係指兩塊麵包會搽上炸蒜蛋黃醬，而漢堡中間再加一層秘製生蒜蓉，生蒜蓉嘅嗆辣風味非常突出，可以解膩又唔會完全蓋過牛肉肉味。
 

N+ Classics with N+ Thousand Island（$75）

另一款千島醬就係經典嘅酸甜口味，味道濃郁醒胃。亦有原味即係走醬，可以品嘗到安格斯牛肉、美國芝士、蕃茄、酸青瓜、白洋蔥圈同脆綠毛菜嘅（Green Lollorosso）原味。
 

N+ Limited Truffle Burger（$100）+ Make it as Combo（+$50）

N+ Limited Japanese Mustard（$95）

另一個N+ Limited系列嘅漢堡會用6oz嘅牛腩肉漢堡取代N+ Classics嘅4oz牛肉漢堡，食肉獸更可以選擇雙層漢堡肉！Truffle Burger加入自家製黑松露醬同炒本菇，黑松露獨特香氣同牛肉肉味好夾。而Japanese Mustard顧名思義即係加入日式芥末醬，口味相對清爽。每款漢堡加$50轉做套餐就包埋薯條同汽水。
 

Wedge Cut（$30）

小食方面就有用美國薯仔製作嘅薯條同薯角，炸至金黃香脆，口感偏硬少少。亮點在於有三款秘製調味：BBQ醬、蜜糖芥末醬同肯瓊香料粉（Cajun Powder）。最有驚喜嘅係BBQ醬，比坊間一般BBQ醬更有層次而唔死鹹，大廚指秘訣在於比例，同將部分材料炒過以去除澀味。蜜糖芥末醬甜辣唔膩，肯瓊香料粉就以辛香料豐富風味為主。
 

N+ Burger

地址：灣仔汕頭街32號地舖

文：Cathy.H
相：Yan Yan、餐廳提供
片：Yan Yan