去日本食快餐店或者拉麵店，都好常見自助點菜機，想食咩手指指就得，唔使店員落單夠晒方便。荃灣新開嘅團日式拉麵都引入咗一部點菜機，可以自己柯打，好似去咗日本咁呀！
負責人稱，因為想營造出日本感覺，而且可以慳人手，專誠喺台灣搵到呢一部點菜機，運費連安裝都唔平架！呢一部比起日本常見嘅更新潮，按鈕較大，而且有螢光幕可以touch screen，操作方法唔算複雜。餐牌一眼睇晒，揀好拉麵，再touch screen揀麵條、走葱等，確定落單入錢就得拎單，成個過程好快手。如果冇散紙，都可以同店員唱。
舖頭主打四款特色拉麵，包括黑蒜油、櫻花蝦、魚介同辛味拉麵，都係以豚骨湯底做base，反而冇原味，大廚Rex稱因為想喺荃灣區做啲唔同口味，唔會同其他拉麵店撞。Rex曾跟隨日本師傅學習煮拉麵，湯底以60斤豬骨及豬手熬十幾個鐘，然後每一款再加上自製醬油、拉麵醬及調味，口味濃而唔會太杰稠，食落唔會好重味或者口渴。麵條都係日本運來，有質感較彈牙嘅曲麵及較索湯嘅直麵，鍾意邊一款可以自己揀。
黑蒜油拉麵（$83）嘅黑蒜油都係自家製，用大量蒜頭炸香製成，香氣極濃。每碗再加埋生蒜同炸蒜，蒜香好濃，食完個口仲有陣陣蒜味！
櫻花蝦拉麵（$88）就用日本蝦油同埋拉麵醬，蝦香濃郁，加上一大堆櫻花蝦，鍾意海鮮鹹鮮味嘅就一定要試！
辛味拉麵（$85）工序最多，辣油、辣肉碎都係自家製，聞落有大陣辣椒香，但食落辣度溫和，都幾惹味！
魚介拉麵（$80）就最可以食到豚骨湯底原味，加咗魚介粉同埋木魚花，可以嗒到陣陣魚鮮。
溏心蛋用日本長崎白蛋製作，人手去殼唔係用來貨，以日本醬油浸過夜，醬油味刻意做到唔太濃，想突出返蛋味，蛋黃當然係流心軟滑。
想飲可樂？不如試吓店舖專登引入嘅日本特色汽水，好似青芥辣薑啤、富士山可樂、抹茶可樂等，最受歡迎係桃味同提子味cider。
開業短短個幾月已經有人排隊等食，證明有時唔係日本過江龍先至好嘅，本地薑有心做一樣可以做得好好！
地址：荃灣大屋街18號金豐閣地下1-2號舖
文、相、片：Perrins