呢間最新人氣打卡餐廳，以夢幻嘅萬花筒為主題，無論裝修定菜式都色彩繽紛又有藝術感。從大門穿過幻彩三角鏡隧道，裡面有彩虹鏡面牆、七彩琉璃珠子柱、浪漫紫藤天花板等。食物方面以甜品最有驚喜，從賣相到味道都有水準。
彩虹色牆加上兩端嘅鏡面，形成無盡七彩鏡子世界
漫花燈火OMG新店位於土瓜灣，佔地2,000平方呎。品牌2019年曾於大角咀開業，但後來因為社區重建關係結業。今次重開保留三角鏡萬花筒隧道，每張枱上面亦有一個萬花筒，畀大家重拾兒時玩萬花筒嘅快樂同純粹。
招牌夢幻藝術糖甜品
潘朵拉的盒子-延續（每日限量供應，$168）
延續前店嘅經典甜點，頂層係半透明、以藝術糖（Isomalt）製作而成嘅粉色糖罩，用金色槌仔敲碎後，下面係自家製作嘅竹炭圓撻。
撻裡面有黑芝麻慕斯、自家麻糬、焦糖杏仁碎，彩色忌廉更有流心效果！味道以芝麻香為主、甜度適中，口感層次豐富。
FIKA（$128）
可以食嘅雲朵其實係慕斯，下面係宇治抹茶金寶、北海道紅豆同自家牛奶麻糬，宇治抹茶金寶嘅茶香相當突出、有回甘，牛奶麻糬口感軟糯，加埋紅豆係經典不敗組合。
人氣牛油果三文魚他他
自家製酥皮黑魚籽牛油果煙三文魚水牛芝士波波他他（$168）
最受歡迎嘅前菜，以自家圓形酥皮包住牛油果、煙三文魚、水泥芝士波波，頂部再以黑魚籽同金箔點綴。食嘅時候建議將酥皮壓碎，撈埋一齊食就係味道豐富嘅香脆他他，可以先試原味，中間按喜好配搭旁邊嘅洛神花士多啤梨醬汁，酸甜醒胃。
西班牙伊比利亞辣肉腸白酒忌廉煮藍青口配牛油多士（$128）
藍青口肉質飽滿、鮮味十足，以白酒忌廉汁煮過更香甜。亮點在於醬汁濃郁Creamy，配搭西班牙伊比利亞辣肉腸，鹹辣風味增加層次同時襯托出藍青口嘅鮮甜！一定要用牛油多士點醬汁嚟食，多士亦做成Bite Size好貼心。
油封法國鴨腿伴自家製芝士薯蓉及蜜糖紅菜頭（$248）
餐廳唔少菜式採用慢煮真空低溫烹調法（Sous Vide），令肉質更鮮嫩同保留更多肉汁。呢份油封法國鴨腿就係其中一道，因為油封就係以食材浸喺油中慢煮，令鴨腿更為柔嫩鮮美。外層鴨皮亦更為甘香，而蜜糖紅菜頭味道清甜、平衡油膩感。
打卡富士山特飲
富士山·破曉（$82）
呢杯特飲以蝶豆花嘅天然藍色同奶泡嘅白色模仿日本富士山，賣相別緻。再撒上焦糖脆脆增加口感，飲落以黑糖甜味為主，略嫌比較單調。
瑰麗香水瓶（$72）
呢杯梳打以高腳杯奉上，更有搶眼漸層。底部係士多啤梨果泥，加上玫瑰梳打，士多啤梨嘅甜味同玫瑰花香好夾。
士多啤梨綠茶（$68）
想飲熱飲亦有四款花果茶選擇，士多啤梨綠茶以士多啤梨嘅酸甜香氣為主，清爽怡人。
三角鏡萬花筒隧道係最多客人打卡嘅地方
天花板掛滿浪漫紫藤花
兩個紫色卡座私隱度十足
漫花燈火OMG
地址：土瓜灣九龍城道68號瑧尚U PLACE2樓201號舖
文：Cathy.H
相、片：Tom Li