葵廣美食2023！明太子啖啖肉炸雞、自家製爆漿冬甩

講到香港嘅美食小店集中地一定非葵廣莫屬喇！嚟到2023年中，有舊舖結業，但同時迎嚟唔少新面孔，包括啖啖肉嘅炸雞、好有特色嘅自家創作料理、自家製爆漿冬甩同令人愈食愈上癮嘅螺絲粉，下次去掃街時可以試下！

香脆明太子炸雞啖啖肉

食炸雞最重要就係香脆唔油膩。呢間小店嘅店主曾經喺米芝蓮餐廳任職，自創秘製啤酒炸漿，外層酥脆鬆化，一啲油膩感都無。選用無骨雞肉，咬開雞肉仲保留滿滿肉汁，好出色呀～口味方面最受歡迎係蜂蜜脆脆啖啖肉，鬆脆嘅外皮塗上香甜蜂蜜，甜甜鹹鹹又有邊個抵抗到；明太子醬味道鹹香，混入沙律醬令味道無咁濃烈，更能帶出明太子風味。黑白松露醬都不得不試，黑松露醬再加埋白松露油，香氣同味道都更上一層樓！

酸辣涼拌魚皮宇治初時@自家創作料理

圖: lazysloth_foodie

主打自家創作料理嘅小店，款款都係店主招牌菜呀。以涼拌同埋酸辣小食為主，宇治酸辣醬涼拌魚皮係最受歡迎嘅招牌小食，魚皮大大塊，口感爽脆彈牙，自家製酸辣醬辣度分4級，用指天椒、蒜頭、酸菜同菜脯，口感獨特同時香氣十足，愈食愈開胃，大推！另外仲有伴麵同拌讚岐烏冬等選擇，配料推介豬軟骨，炆得軟腍入味，同埋可以試埋麻酸辣醬，多咗一份麻嘅層次～

新鮮自家製爆漿冬甩 So doughlicious

圖: sohyeon_sharing

鍾意食甜嘢嘅朋友一定要食，呢間自家製爆漿冬甩已經進駐葵廣啦。小店主打冬甩、三文治、炸物小食同埋星期一至五仲有special menu添～必食當然係冬甩，落完單要等大約8分鐘先有得食，一拎上手仲係熱辣辣㗎，口味有Nutella、伯爵茶、士多啤梨及檸檬等，除咗Nutella全部餡料都係自家製，好有誠意。另外呢個神級炸蘑菇都值得一試，蘑菇切片後即炸，炸得非常脆口同時滿滿蘑菇汁，有陣陣parsley香味，點埋黑松露醬，真係神級。