咖啡同科技有咩關係？食嘢兼顧可持續發展？最近一間教育科技公司喺銅鑼灣開咗佔地超過5,500平方尺、樓高四層嘅餐飲生活概念店，同時亦係全球首間旗艦店！集咖啡店、酒吧，同自由學習空間於一身，將科技融入生活。
 

地下為方便Grab & Go嘅Multiverse，貫徹純白裝修加上高樓底好有空間感

Preface Coffee & Wine旗艦店選址銅鑼灣，同天后、中環店最大嘅分別係請嚟知名餐廳總廚設計多款菜式，而且選用本地食材，糅合可持續發展嘅理念去烹調。咖啡就沿用本地咖啡烘焙商roastwork出品，團隊更會用大數據預測咖啡潮流，為大家提供更多選擇。
 

Hand Drip（$70）

單品豆係印尼蘇門答臘嘅公平貿易咖啡豆，比起坊間常見嘅埃塞俄比亞豆或者肯亞豆更低碳足跡，同時又有穩定嘅質素。而且選用黑蜜處理，熱飲甜感較高，可以品嘗到印尼咖啡豆嘅經典煙燻風味；放涼後酸味提升，有啲似柚子嘅風味。之後計劃會從更多唔同地區，包括巴布亞新幾內亞、台灣、雲南等引入單品咖啡豆。
 

Espresso Macchiato（$40起）

Espresso就用上巴西、哥倫比亞、危地馬拉同印尼拼配豆，帶濃烈黑朱古力同堅果香氣，加上奶泡增加口感，同時奶香亦令Espresso更易入口。
 

Coffee Jelly with Milk（$40）

靈感嚟自茶餐廳嘅「啡走」，用咖啡渣再沖調，自家製成味道清爽嘅咖啡啫喱。然後按喜好倒入香甜嘅煉奶，令咖啡香更突出，亦平衡咖啡嘅苦味。
 

佩克里諾芝士番茄意式三文治（$45）

以意式Puccia麵包配搭新鮮蕃茄片、佩克里諾羊奶芝士，醬汁係加入美國南部常見紅眼肉汁製作嘅咖啡蛋黃醬同芥末。麵包烤至香脆，同多汁嘅蕃茄、帶鹹香嘅芝士非常夾。
 

法式烤雞長法包（$55）

烤雞胸肉嘅時候喺下層放入蔬菜，吸收雞汁精華嘅蔬菜自然更香口！配搭香脆嘅長法包，增加口感層次。
 

法式澄清雞湯（$40）

雞骨亦唔會浪費，以新鮮雞骨每日熬製超過六小時，去除雜質、隔油後得出清澈嘅雞湯。再加入當季蔬菜，啖啖鮮甜。
 

 

尼斯吞拿魚沙律（$50）

源自法國南部嘅尼斯沙律選用吞拿魚配搭新鮮生菜、番茄、青瓜、薯仔、橄欖、烚蛋等，再淋上自家調配嘅法式醬汁，清爽又有飽足感。貼心點係可以將吞拿魚改為牛油果，跑素朋友都食得！
 

蟹肉牛油果烤吐司（$95）

香脆吐司塗滿牛油果醬，再加上新鮮蟹肉、自家蛋黃醬同檸檬汁，味道以蟹肉嘅鮮甜為主，整體相當清爽。
 

意式番茄蒜蓉大蝦（$130）

香口嘅蒜蓉大蝦加上以蝦殼熬製嘅傳統意式蕃茄湯，酸酸甜甜又惹味，放喺烤過嘅法包片上一齊食，配酒一流！
 

意大利香腸拼盤（$150）

另一款送酒推介，當中有坊間少見嘅意式開心果肉腸、意式乾燥醃製豬肉、意式風乾牛背肉、西班牙式發酵香腸等等，三五知己開心Share送酒啱啱好。
 

精選紅/白酒

暫定12月起將會陸續推出各款酒類飲品，餐廳精選一系列以生物動力自然農法（Biodynamic Farming）釀製嘅有機紅、白酒，選擇眾多。
 

一樓為方便用餐兼Work-friendly嘅Metaverse，保留天后店嘅梯級座位（照片由餐廳提供）

二樓為舉辦科技工作坊嘅Megaverse，而五樓即將開業嘅書店及生活概念店名為Omniverse。樓層以多元宇宙為題，比喻知識寬度無窮無盡，呼應Preface「序言」本義，可以喺呢度重新想象未來嘅可能性。
 

Preface Coffee & Wine
地址：銅鑼灣霎東街11號The Sharp地下及1樓

文、相：Cathy.H