長洲係家庭、情侶一日遊嘅熱門地點，有得輕鬆行山之餘，又可以食盡多款美食。長洲嘅行山景點主要喺南邊，其中小長城方向沿路有唔少奇石，更可飽覽一望無際嘅大海。呢段路大約個半鐘至2個鐘行完，11am左右入到去起步嘅話，重有時間試兩、三間餐廳。今次就介紹4間打卡餐廳畀大家，等你醫肚同時影靚相開心下～
小長城沿路景色
創意串燒 長洲鐵漢
今年因為疫情持續，再次取消搶包山活動。想攞個意頭嘅話，可以去呢間新開嘅串燒店，食獨家創作嘅流沙奶黃脆脆平安包，一咬開就有香滑嘅奶黃流出嚟。佢哋更將長洲特產之一嘅鹹蛋臘腸餅製成蜜燒版，鹹中帶甜又有咬口。另外重有風琴豆卜、金菇肥牛卷、廣島蠔等口味大眾化嘅串燒。配埋復古瓶裝、由日本直送嘅Asahi烏龍茶同三矢蘋果梳打，一次過滿足解油膩同打卡嘅需要。
餐廳為支持醫護人員，無論堂食或外賣，落單時出示醫護行業有效證件同身份證核對，即享8折優惠。
流沙奶黃脆脆平安包（圖：餐廳IG）
左：蜜燒鹹蛋黃臘腸餅｜右：日本直送特飲（圖：餐廳IG）
鹿角蕨主題 OXY CHEUNG CHAU
喺呢幾座近百年歷史嘅樓房之中，橙色門口係長洲近期嘅人氣cafe。舖內掛滿由台灣引入嘅鹿角蕨板植，而oxygen（氧氣）係人同植物都需要嘅元素，所以店名取自氧氣頭3個英文字母。大家可以嚟學整板植，或者嘆杯咖啡食件cake。其中一位店主特別設計出陳皮Coffee Tonic，面頭灑上陳皮粉同一片自製嘅香橙果乾，開頭味道比較刺激，後尾會有種開胃解膩嘅感覺。而甜品必試少糖版Basque Cheesecake，由店主自家製作，口感好幼滑。另外Brownie集軟、綿、滑於一身，唔會好似食緊蛋糕咁。
佢哋亦加入撐醫護行列，凡持有有效醫院管理局員工證，會免費送上OXY特選House Blend掛耳包一份，入面選用來自巴西、哥倫比亞同薩爾瓦多嘅咖啡豆，Nutty中帶濃厚杏仁同榛子香味。
由愛情鎖牆向沙灘方向行會經過OXY CHEUNG CHAU
鹿角蕨板植workshop除咗教大家培育鹿角蕨，亦會附送咖啡（店門古式嘅木柵係其中一個打卡位）
左：陳皮Coffee Tonic有濃郁嘅果酸味 ｜右：日本宮崎銀鏡柚子梳打咖啡味道清新
左：Basque Cheesecake口感creamy｜右：Brownie配埋雪糕，冷熱交融更滋味
日式甜品店 茶山
喺長洲想揾日式感覺嘅話，呢間甜品店幫到你。由於飲品方面主打台灣茗茶，佢哋將帶有牛奶香氣嘅招牌金萱青茶茶葉，放喺香薰座「點燃」，令你一入去就聞到陣香甜嘅味道。甜品則主打3個類別，口味以唔同嘅鮮果為主。首先係梳乎厘班戟，用韓國麵粉同日本雞蛋製作，食落空氣感同蛋香十足；其次係約有10層嘅雪糕芭菲，各口味嘅層次設計都略有不同，有咬口亦唔會太甜；再者有牛角窩夫，口感煙韌，配嘅醬料同雪糕各有3款口味畀你揀。
現時6pm後，牛角窩夫買2送1，或買4送1份心太軟連雲呢拿雪糕。
茗茶設有杯裝冷泡茶或壺上嘅熱沖方式，可自選茶杯（圖為招牌金萱青茶）
哈蜜瓜梳乎厘班戟配嘅鮮果都幾多
草莓雪糕芭菲底部用啫喱托起草莓，做出懸浮效果
左：香印青提牛角窩夫（堂食有兩件牛角窩夫）｜右：香蕉棒子朱古力牛角窩夫（外賣係單件裝同走雪糕）
露營風cafe Haika Coffee
如果想又食又shopping，可以去碼頭附近嘅露營主題cafe。店名源於「Hiker」嘅日文發音，有遠行者嘅意思；店內則有賣露營相關嘅生活雜貨，加上室內外座位均採用露營用嘅檯櫈，氣氛好chill。嚟到一定要試自家製嘅手工蛋糕同麵包。其中若竹抹茶戚風蛋糕所用嘅抹茶粉、麵粉、雞蛋等食材都來自日本，口感鬆軟濕潤。而髒髒撻即係朱古力雞蛋布甸撻，外皮用法國無鹽發酵奶油同法國Valrhona 100%可可粉焗製；內餡則用日本雞蛋製作布甸，加上面層自家調配嘅少糖黑朱古力醬，配咖啡一流。
圖：
若竹抹茶戚風蛋糕用小山園若竹抹茶粉製作（圖：餐廳IG）
髒髒撻切開嘅效果非常IG-able（圖：餐廳IG）
文：Cathy.C