對一眾食肉獸嚟講，最開心莫過於可以任食高質嘅豬肉牛肉雞肉……啦！機會嚟喇飛雲！西環有間燒肉店即將會推出個放題任食燒肉套餐，有成60款嘢揀之餘，再配多盤海鮮拼盤呀，係幾多選擇嘅。呢90分鐘嘅時間入面，應該會幾忙。

 (左上)牛頸肉、(右上)牛肋肉、(左下)安格斯牛仔骨、(右下)安格斯牛肉粒串

60品套餐入面，主要有牛、豬、雞同羊肉。而放題食到嘅肉都唔一定係爭啲啲嘅，呢度就照樣有美國安格斯牛仔骨、安格斯牛肉粒串、牛肋肉同牛頸肉揀，肉味香濃，而且預先用黑椒醃好，入味啊。

 (左上)味噌豬大腸、(右上)黑豚荔枝肉、(左下)味噌豬頸肉、(右下)日本豚腩厚燒

豬肉方面，就有日本豚腩厚燒、味噌豬頸肉、味噌豬大腸等等，仲有招牌菜之一嘅黑豚荔枝卷。即係用豚肉包住荔枝肉，燒完之後啲荔枝汁唧晒出嚟，令到塊肉更香甜。

  (左上起)雞心、雞軟骨、雞腎、(中)香辣雞扒、(前左起)雞骨腸、雞肝

喜歡食內臟嘅朋友，雞肝、雞心、雞腎都有得任食，另外仲有雞軟骨、香辣雞扒、雞骨腸等等。

燒緊未有得食嗰陣，可以食住啲前菜、小食先喎，紫洋蔥和風冷蕃茄、炸一口芝士、炸池魚仔之類。

至於海鮮拼盤，每日會有6款新鮮時令嘅配搭，包括鱈場蟹腳、蘇格蘭蟶子皇、翡翠螺、馬刀貝、海中蝦、或者大蜆等，鮮味爽口。不過留意返，海鮮係唔包喺60品入面嘅，之係話如果想再encore，就要加錢喇。

咁多嘢食，配埋生啤就perfect池喇。生啤都有放題嘅，但就要加少少錢啦，而如果唔飲啤酒嘅朋友仔，都有幾款果味梳打（巨峰、荔枝、青檸）可以揀。

推出日期：3月5日
價錢：$258/位

七輪燒肉
地址：西環堅尼地城科士街40號地鋪

文、相：Kar