Cafe熱潮延續到新一年，呢間新店就開喺觀塘海濱附近，樓底高又有多面落地大玻璃，有自然光感覺特別舒適。供應多款精品咖啡、意粉、輕食，好似其中一杯咖啡就叫「2019」，味道層次豐富。仲有唔少人大推嘅Tiramisu窩夫，咖啡香同朱古力香都好濃郁呀。
 

Master Room係同區One Little Room嘅姐妹店，店名嘅Master唔係指大師，原來係指地方大咗，供應嘅食物亦多咗，就好似主人房咁好重要。裝修以水泥同木為主，木枱請嚟本地長尾工作室嘅木匠打造，好似中間嘅5m長枱就用咗香港嘅非洲桃花心木，靠窗嘅木枱就用木酒箱拼接意大利磁磚。
 

西班牙蛋餅（Lunch Set $108）

將本店最出名嘅西班牙蛋餅都帶到新店，口感外脆內軟，邊位焦香味更突出。蛋餅嘅雞蛋香，煙肉嘅鹹香同肉味，薯仔嘅粒粒口感，甜椒同洋蔥清爽，同Mozzarella芝士嘅香味都食得出，味道豐富調味得宜，果然係招牌菜。
 

冬蔭功帶子蝦意粉（Lunch Set $128，單點$118）

原來本店之前有位咖啡師係泰國人，就教咗佢哋整呢個冬蔭功帶子蝦意粉。先係聞落有濃郁辛香料味，食起嚟味道偏辣，建議唧埋青檸汁落去，酸酸辣辣更開胃。帶子軟嫩彈牙，蝦肉亦相當結實。
 

提拉米蘇窩夫（$78）

首先要讃下上枱嘅時候碟係雪凍咗嘅，可以Keep住甜品溫度夠貼心。雖然本店都有窩夫，但新店呢邊會偏傳統窩夫風格，牛油香味突出啲。兩大塊外脆內軟窩夫中間同頂都有忌廉，再灑上餐廳嘅House Blend咖啡粉同75% Single Origin朱古力，所以食落無想象中咁甜，咖啡朱古力香並重。
 

 

Crispy Sweet Cappuccino（$44）

喺Cappuccino上面加一層黃糖，再用火槍燒成焦糖脆面，所以飲嘅時候亦可以好似食焦糖燉蛋咁，先敲開脆面嚟食，再飲下面嘅咖啡。焦糖唔單止脆口、富焦香，甜味亦帶出咖啡醇香。餐廳嘅House Blend係哥倫比亞、巴西同衣索比亞嘅拼配，帶黑朱古力風味。
 

2019（$44）

2019年對你嚟講會係咩味？咖啡師就用一款有煙燻味道嘅辣椒粉去做咗呢杯2019。飲嘅時候建議唔好搞勻，會先聞到辣椒粉嘅煙燻味，然後係咖啡嘅微苦同微酸。因為House Blend係淺炒豆，果酸味都幾明顯。最後就會有辣椒粉嘅辣味，層次分明，味道多變。
 

Cafe亦有展示攝影作品

Master Room
地址：觀塘偉業街223號宏利金融中心地下

文、相：Cathy