除咗疏乎厘pancake，另一樣近日喺香港大為流行嘅日式食品，應該非玉子燒莫屬，葵廣、旺角等都有唔少地方開咗專門店，就連觀塘一間超巿，都引入咗呢道日本雞蛋料理。

明太子玉子燒

芝士粟米玉子燒

日本煙肉馬鈴薯玉子燒

舖頭開喺超巿內，細細間，6張枱仔，但食物款式就一啲都唔少。主打嘅當然係玉子燒，但menu上同時仲有烏冬、炸物、蛋糕等小食。玉子燒有6款口味，最受歡迎嘅當然係可以拉絲嘅芝士粟米同鹹香微辣嘅明太子，另外亦有獨創新口味：日本煙肉馬鈴薯。

由雞蛋到調味料都係由日本生產同進口，每份玉子燒前後舀入4殼已經混入鰹魚汁嘅雞蛋漿，邊加邊煎，逐層翻捲，最後用竹壓實成形。4層玉子有返咁上下厚度，口感甚佳，係幾滑嘅，蛋香味重之餘，調味亦剛好，食得出鰹魚汁嘅鮮，唔會太鹹或太淡。不過由於全部都係即叫即燒嘅關係，就要稍為等耐少少喇。

而銅鑼燒就係由日本長野縣進口，口感煙韌彈牙，有抹茶紅豆味、cream cheese味等選擇。

麦玉子
地址：觀塘觀塘道418號創紀之城五期(apm)地面低層一田超市

文、相：Kar