尖沙咀呢間主打摩登中國茶同素食嘅餐廳不時推出新菜式，好似最近就有喺IG大熱嘅水果刨冰，用各款新鮮Juicy水果，配自家製特濃牛奶刨冰或者清香觀音茶冰。呢個夏天各位Foodie就可以帶埋相機去收「冰」！
 

蜜瓜碗·農場牛乳刨冰（$108）（15:00起供應）

2DP之前換咗餐牌，多咗唔少甜品選擇，而喺Instagram上最多人打卡嘅就係呢款蜜瓜碗刨冰！半個蜜瓜殼裡面係用咗北海道純生37奶油加北海道特濃3.6牛乳，經特製冰機刨出嚟嘅牛奶冰，雪白細碎，比韓式雪花冰更有雪花嘅感覺！入口即溶但又保留少少冰嘅咬口。
 

一粒粒蜜瓜鋪面夠搶鏡之餘，食落亦相當香甜多汁，柔軟嘅口感更加加分。牛奶冰中間仲有台灣粉紅芭樂醬，芭樂醬食落有少少芭樂嘅顆粒感，微甜清新，如果唔夠嘅話可以要求另加喔。
 

車厘子·金奇異果·觀音冰（$88）（15:00起供應）

係咪無諗到刨冰可以用煲仔奉上？用每日新鮮直送車厘子，配用金奇異果打成嘅果醬同有機鐵觀音茶刨冰。鐵觀音刨冰口感同牛奶冰差唔多，但味道就清新得多，茶香濃郁而回甘持久。
 

車厘子飽滿多汁，驚喜在於金奇異果醬味道酸酸甜甜而唔會太濃，搭配觀音茶刨冰可以增添一份果香，感覺更加Refreshing！
 

西瓜碗·農場牛乳刨冰（$98）（15:00起供應）

另外亦有西瓜碗刨冰，粒粒紅色西瓜加咗蜜糖，多汁之餘更添一份清甜！下面嘅牛奶刨冰中間加咗金奇異果醬，用微酸平衡返令成碗冰唔會太甜膩。
 

 

水蜜桃窩夫伴普洱朱古力意大利雪糕（$98）

窩夫選用日本麵粉，所以食落口感比較彈，略嫌水蜜桃味道唔係好突出。窩夫上面嘅紅茶忌廉反而相當濃郁，入口紅茶香同牛奶香平衡有致。而普洱朱古力Gelato用嘅係百年古樹茶種嘅普洱茶葉，普洱濃香配朱古力碎甜而不膩。
 

柚子薄荷鐵觀音香檳（堂食$46，外賣$32）

鐵觀音點樣變香檳？其實係將氣泡打到冷泡有機鐵觀音茶當中，去模仿香檳嘅口感，係無酒精成分嘅Mocktail嚟嘅。口感比一般嘅更柔滑細緻，加上薄荷味道更清爽。而家逢星期一至五，下午茶（15:00-18:00）買任何嘢食都可以免費換一杯呀！
 

2DP
尖沙咀厚福街12至12號A藍馬商業大廈地下
*刨冰於15:00起供應，售完即止

文、相、片：Cathy