選擇多多 City'Super
聖誕大餐唔係唔鋸扒或者食火雞呀嘛？除咗幾個預設套餐之外，City'Super仲提供自選套餐任你點：首先喺燒美國火雞、燒美國安格斯有骨牛肉眼、蜜汁烤維珍尼亞火腿同寶雲酥焗羊架之中四揀一。
揀完之後再揀多個combo，如果覺得已經食咗太多肉嘅，可以諗諗「聖誕輕食」，輕輕der有田園沙律盒、煙三文魚拿破崙、沙律五重奏、法式焗薯同RingoWork 特選蘋果汁1支。
想食海鮮餐嘅就柯打個「海鮮盛薈」啦，有 特選刺身盛、龍蝦海鮮凍、煙三文魚拿破崙，生嘅又有熟嘅又有，仲有沙律五重奏同聖誕蛋糕，係豐富嘅。
大胃王嘅朋友叫呢個「星級派對」就最啱嘞，自家製煙燻豬手配酸椰菜、聖誕芝士凍肉拼盤、傳統意式肉醬千層麵、法式焗薯 、特選壽司盛 、沙律五重奏加埋聖誕蛋糕肯肯定滿足到你胃！
如果你有成打朋友仔嘅，就一定係揀「豪華聖誕派對套餐」，咁就大包圍，咩都有得食喇。
詳情及網上訂購：http://bit.ly/1OiDD1b
平民之選 大家樂
想平平地食聖誕大餐不是夢，大家樂嘅派對套餐最平998蚊已經有交易，原隻美國燒火雞都只係425蚊隻，唔食火雞食炸雞都一樣得：（登登登燉）Fusion「Dip Dip 炸雞‧棒棒蝦併盤」！有炸雞粒啦、炸棒棒蝦啦同魚子蟹肉球配卡邦尼醬。
怕熱氣咩？咁要「雙份加拿大龍蝦鮮果沙律」啦，每盤沙律都有兩隻空運到港嘅加拿大龍蝦，成5磅重㗎。又或者要返個 「黑白松露鮑魚‧煙三文魚併盤」，原隻鮑魚加黑松露醬同白松露油，黑白雙煞。話晒呢期松露當造，呢個配搭可以話係平民價錢皇帝享受呀喂。
電話：2601-7890
團體聯誼 AEON
如果你交遊廣闊，又或者身為班會、公司、各大團體嘅康樂組組長，奉命要搞返個三十幾四十人嘅聖誕派對嘅話，都唔使頭痕嘅。AEON有大堆頭套餐，沙律、小食、火雞、壽司、主菜、甜品全部齊晒，免卻搞手左揀右揀，揀完又驚份量太多/太多等等嘅煩惱，既方便又快捷。
詳情及訂購網址：www.aeoncity.com.hk
和風聖誕 一魚壽司
要過一個日式聖誕都冇問題，喺一魚壽司訂返個「一魚外賣聖誕盛」啦，4人餐同8 人餐分別會有大約30件同60件壽司、刺身（$328 / $618），其中包括新登場嘅紙杯壽司，即係喺圓形卷物嘅壽司飯上面放幾款嘅食材，海膽呀、三文魚呀、甜蝦呀、黃金魷魚呀、芥辣赤海老呀、飛魚籽呀咁，一啖食到幾種層次，好特別㗎呢~
電話：2562 1602
蟹迷心動 千両
早排就大閘蟹當造，聖誕節就輪到食毛蟹同鱈場蟹喇！千両嘅聖誕盛盒除咗有壽司同刺身之外，仲有呢兩款蟹食啊！毛蟹（盛盒$280）雖然成身毛耷耷，但係打開蟹蓋同蟹身都有大量又香又甜嘅蟹膏，肉質爽口。
鱈場蟹（盛盒$580）係日本人嘅過節食品之一，機票太貴去唔到日本嘅，咪喺香港食住、頂住癮先囉，好清甜好有鮮味㗎。
電話：2101 1789
文：Kar
隨時接收最新資訊
讚好OpenRice專頁！
