一日三餐即係代表每日都要諗食咩呢個問題三次，相信唔少男士都曾經畀身邊嘅女友用相同嘅問題考起。除咗之前開飯仔搵過嘅香港罕有外國菜，今次再幫各位搵多6間平時大家應該比較少試嘅外國菜餐廳，一試中西意日韓菜以外嘅滋味。
尖沙咀正宗摩洛哥菜 Casablanca Restaurant & Cafe
餐廳唔單止裝修環境有異國風情，Menu上亦寫明有清真食品認證。招牌菜之一Chicken Tagine用嘅係摩洛哥一款特色燉鍋，塔形蓋令食物燉煮時更原汁原味。雞肉加咗檸檬、橄欖同唔同香料，食落相當軟腍入味，最啱點麵包一齊食。另外Moroccan Harira同Couscous Lamb都係推介，鐘意薄荷香味嘅話，更加係必點Moroccan Mint Tea。
大角咀埃及菜小館 曉峰閣
講起埃及菜剩係諗起豆茸？少年你太年輕了。嚟到呢間小館，雖然的確係有豆茸食，但同時亦有大路嘅Pizza同意粉，但開飯仔就建議大家可以一試佢地嘅焗飯。埃及特色焗羊腿肉飯用咗番茄同芝士去焗羊肉，即叫即焗夠哂熱辣辣香噴噴，下面嘅飯亦加咗香料食落特別惹味。唔鐘意食羊嘅仲有芝士雞脾配埃及飯等選擇。
旺角土耳其私房菜 我愛伊斯坦堡
圖：阿啦
有選擇恐懼症嘅朋友仔就最啱去呢間位於旺角嘅樓上Cafe，因為有唔同定價嘅 Design Set，食咩由廚師話事，而如果對部分食物敏感亦可以先Book枱請廚師注意，非常貼心。菜式以土耳其同中東菜為主，例如土耳其乳酪芝士炸物同梅爾辛紅飯釀烤雞等。特別推介呢度嘅沙上咖啡同土耳其軟糖，有特色之餘又呃到Like。
更多【二人前指南】： |
上環清新地中海菜 MedOven
覺得以上介紹嘅菜式都有少少「重口味」？咁就可以嚟呢度試用以天然同健康美食做主打嘅餐廳喇，地中海菜以大量蔬菜同橄欖油入饌，例如地中海香草焗龍蝦配希臘雜菜沙律就靠龍蝦上面嘅配菜帶出龍蝦鮮味。而地中海燒全春雞亦外脆內Juicy。輕食選擇有賣相趣致嘅帆船素薄餅同唔同配搭嘅沙律，最後食多杯希臘乳酪做甜品就啱哂。
灣仔抵食墨西哥Brunch Coyote Bar & Grill
唔知係咪因為墨西哥人比較熱情豪爽，連墨西哥菜感覺都特別繽紛又Joyful，灣仔呢間酒吧餐廳逢星期一至五同星期日都會供應任食自助午餐，選擇當然唔及平時去酒店食嘅咁多，但勝在冷盤、沙律、小食、熱食同甜品都有齊，Refill速度又夠快。小食可以先食墨西哥粟米脆片，熱食有特製 BBQ 豬仔骨同墨西哥燉豬肉，加埋番茄飯實夠飽。
天后惹味中東Kebab 哈比斯燒肉串和咖哩
就算無時間坐低慢慢食，想Grab and Go都一樣有特別選擇嘅，天后呢間就專賣卡巴(Kebab)，用Pita包包住生菜、洋蔥、番茄、燒肉同自選醬汁，羊肉香噴噴唔太羶而雞肉香口又Keep到肉汁，最緊要係大大份又足料。想再飽肚啲嘅可以嗌埋咖喱配印度烤餅，咖喱香料惹味唔太辣，印度烤餅亦相當鬆軟。
文：Cathy
