是咁的，話說將軍澳最近有間新開飲品店，Logo係本地插畫師謝曬皮作品，最搞笑嘅係啲飲品名：Cupcake釀梳打、乜得你咁馨香芋拿鐵、啱啱生完咁新鮮水果四季春，仲有個叫與體液相近......到底佢地嘅廬山真面目係咩？睇開飯仔直擊！
 

我想和你無所事事呢個店名就已經夠哂搞笑，原來係BEANS同謝曬皮再次合作，不過今次唔係散水餅而係台式飲品！而且選擇相當多元化，由黑糖珍珠、奶蓋果昔、水果茶、梳打到雪糕都有。
 

GG黑糖珍珠鮮奶（$28）

一嚟唔少得整返杯今年大熱嘅黑糖珍珠鮮奶試下先，黑糖紋唔算好多，不過黑糖珍珠咬落幾Q彈又夠入味，咬咬下仲有少少焦香。最吸引嘅其實係個鮮奶，特別加咗少少忌廉，上面再加奶蓋，搖勻嚟飲又香又滑。
 

Cupcake釀荔枝玫瑰梳打（$34）

外國有冬甩配咖啡，呢度就有Cupcake配梳打，滿足大家飲完嘢又想食啲嘢嘅願望吖嘛。本身果味梳打配七彩珍珠呢個配搭都相當少見，彩色珍珠係用白玉珍珠分別加藍蝶花糖漿同玫瑰糖漿浸成藍紫色同粉紅色，食落煙韌彈牙，味道就分別唔大。梳打飲落帶玫瑰花香，加上氣泡口感幾清新。
 

與體液相近（$48）

前面分類仲寫住「無所事事限定呈獻到底係唔係唔係雪糕」，而佢嘅真身其實係一杯非常豐富嘅雪糕呀！淺藍色係海鹽軟雪糕，配料從杯底數起有士多啤梨、餅碎、蜂巢脆餅、棉花糖、乾橙片、蛋白脆餅同酥條。海鹽軟雪糕鹹鹹地，所以咪取名與體液相近囉，味道同其他以甜味為主嘅配料係幾夾嘅。不過都幾大杯，搵多個朋友仔一齊開心Share會好啲。
 

 

乜得你咁馨香芋拿鐵（$28）+ 暴力般流汗味雪糕（+$9）

想食雪糕嘅話仲有另一個辦法：加喺飲品上面當Topping！暴力般流汗味雪糕其實即係微鹹嘅海鹽雪糕，加喺飲品上面同奶蓋有異曲同工之妙，所以配搭甜嘅拿鐵味道會夾啲。好似呢杯香芋拿鐵係用鮮奶加自家製香芋忌廉，海鹽嘅鹹香可以突出芋頭嘅甜味！
 

GG百香芒果（$42）

果昔主要用新鮮水果加綠茶打成，好似呢杯飲落有一粒粒百香果籽同芒果肉，酸酸甜甜咁非常清新。最值得一讃嘅係上面嘅芝士奶蓋，係店家自己用Cream Cheese打成，同坊間用奶蓋粉整嘅唔同，唔會打完卡就溶哂落杯茶到，開飯仔影完相個奶蓋仲Keep到厚實香滑，鍾意芝士奶蓋嘅朋友唔好錯過！
 

舖頭唔算大，但都特別劃出一角做吧枱。外賣飲品可以用印上Logo嘅紙套，遲啲佢地亦考慮推出環保手提杯套，夠哂細心。打卡位就當然係謝曬皮畫作霓虹燈，最㜺鬼嘅係細心一睇佢居然係用個鼻哥窿嚟飲珍珠奶茶，下次同朋友嚟諗唔到有咩Selfie Pose就可以學下啦（誤）。
 

我想和你無所事事
地址：將軍澳唐德街9號POPCORN 1樓F96號舖

文：相、片：Cathy