新一年即刻有新湯底！譚仔唔再只係得酸辣、麻辣同番茄湯底好耐喇，成日耐唔耐就出下新款，最新推出嘅有紫菜珍．鮮三寶泡椒酸菜魚湯米線，同時有2款全新特飲，香辣惹味小食蒜椒雞腳筋亦強勢回歸呢。

紫菜珍．鮮三寶泡椒酸菜魚湯米線好有睇頭，餸料都鋪滿成隻碗，三寶包括有大大條嘅珍寶仿蟹柳、帶子肉同埋彈牙魚片頭，再搭埋海味濃郁嘅紫菜，都算係平民版嘅「海鮮米線」吖。而湯底則選用咗3種辣椒熬製，包括泡椒、指天椒同青剁椒，初頭幾啖仲係蜜月期，覺得有種清甜同微辣香，不過愈食就愈刺激，辣感會一直縈繞喺口腔內唔散開呢~

餐廳特意請嚟香港歌手鄭欣宜（Joyce）、同埋七仙羽師傅一齊出席活動並率先試食。Joyce透露自己好多時做嘢要唱歌，未必食得咁辣，平時多數都只係可以食番茄湯底，但其實唔使唱歌時，佢係無辣不歡，好鍾意好鍾意食辣。對於今次用咗3種辣椒製作嘅新湯底，佢直言：「Oh My God，好有層次感。」

 （左）忌廉溝豆乳、（右）凍奶蓋熱情果青瓜特飲

 七師傅話飲完有種去咗泰國嘅感覺

一綠一白嘅兩款新特飲，分別係忌廉溝豆乳同埋凍奶蓋熱情果青瓜特飲，前者係忌廉溝鮮奶嘅變奏版，豆乳香中滲出忌廉汽水嘅甜感，七師傅試飲過後表示：「入面有啲豆腐嘅香味，又唔係好甜，比豆漿更加濃」；而後者青瓜味突出，面層加咗層奶蓋，滑得嚟更有助解辣，七師傅話飲完有種去咗泰國大自然嘅悠閒感覺𠻹啊。

 香港歌手鄭欣宜覺得凍奶蓋熱情果青瓜特飲呢個組合，似自己同ANSONBEAN嘅合作

對於兩款特飲用料嘅大膽碰撞，Joyce就覺得好似自己同兩位人氣歌手嘅合作一樣，擦出驚喜嘅新火花。「忌廉溝豆乳似係我同Serrini嘅一個合作，我哋呢個組合有一種新鮮感喺度，因為比較unexpected，但係又有一種familiarity喺度，就好似呢杯咁鮮又甜又香嘅特飲。」至於凍奶蓋熱情果青瓜特飲，Joyce就話聯想起同ANSONBEAN出嘅@princejoyce，青瓜嘅鮮味代表咗ANSONBEAN，而熱情果就係自己，好fresh。

香辣惹味小食蒜椒雞腳筋亦重出江湖，經處理後，雞腳筋已經去咗骨，只係留有軟骨，食嘅時候都好方便，口感爽脆，兼且索盡蒜香同紅油汁，都幾惹味。

譚仔雲南米線
分店地址：（按此）

文：Kar
相、片：Wilfred Chui