貓奴要去報到的喵星人餐廳 | OpenRice 香港开饭喇

喵~喵~喵~ 香港近年愈嚟愈多喵喵餐廳，可以同喵星人一齊喺餐廳食飯不是夢，簡直就係一眾愛貓之人嘅福音！去到呢啲喵喵餐廳，喵喵已經成為咗主角，美食已經被放埋一邊，同喵喵玩都玩到飽嚕，不過循例都係要介紹下嘅（好似係）。

貓咪貓咪home

Photos by missflorence & mmmfoodiary
呢間café喺旺角商廈嘅一個單位入面，佢哋收養咗嘅流浪貓同領養貓，總共超過50隻咁多呀，就算有幾隻喵喵瞓咗覺、幾隻喵喵同隔籬枱玩緊，都應該有隻會同你玩。

入到去就好似完完全全畀喵圍咁，唔淨止有真‧貓，連啲嘢食上碟嗰陣都會畫埋啲喵喺碟邊。芝心西多士一切開，堅係會見到一堆半溶芝士湧流出嚟，仲可以拉芝拉到好長！不過沒有最邪惡，只有更邪惡，仲有另一款芝食：芝士流心蛋吐司！空心嘅吐司放咗隻流心蛋同熱溶芝士入去，夾埋火腿片同洋蔥粒，外脆內軟！又喵又芝士，我諗你哋飽，你哋部相機仲飽！

貓の茶房

Photos by 吾是食嘜 & FATCAT=]
呢間喺荃灣嘅café，差唔多有成30隻貓，其中有10隻係收留返嚟嘅流浪貓，咩品種、咩性格都有，佢哋仲有。cafe有啲畀貓貓玩嘅遊戲設施區，有一種home sweet home嘅感覺，特別係入餐廳前要除鞋，就更加好似返屋企咁。

嘢食方面，就主要以提供輕食為主，薯條呀、串燒呀、cake呀咁，都有啲便當嘅，十零廿蚊算係幾抵食，建議可以叫返啲熱茶飲下。其中香桃杏桃白茶香得嚟又滲出淡淡嘅桃味，另外仲有啲有機嘅美顏綠茶，邊嘆邊玩貓，都幾relax時。

貓衣櫃

Photos by leeteukangin & Kayly Chung
呢間貓餐廳有別於其他貓café，佢係一間土耳其私房菜嚟，係特別嘅，不過如果貓奴係主要為啲貓而去，就可能要預先打去卜定位問清楚先，因為聽講啲貓貓唔係成日喺舖頭，而且佢哋係冇特定menu嘅，食啲咩都係由大廚發辦。

土耳其餐有啲咩食嘅呢？嗯，土耳其人都會食飯嘅，但佢哋好興將啲飯釀入三色椒裡面，甜甜酸酸咁幾特別。另一種釀飯係梅爾辛紅飯釀烤雞，隻雞用咗超過10種香料去炮製㗎，再釀入蕃茄飯，一啖入面包晒飯、肉同菜。而甜品有時係土耳其雪糕配火龍果、一杯仔土耳其咖啡、土耳其軟糖或者開心果千層酥，土耳其雪糕嘅質感同我哋平時食開嘅有啲唔同，比較煙韌，而土耳其咖啡就有啲似齋啡咁，幾濃，略帶苦味。睇下你哋到時會食到邊味啦。

貓貓地cafe

Photos by 熱狗大王 & Oyikelly
貓貓地café大約有廿隻貓，黑貓白貓金毛貓都有，隻隻都咁可愛咁活潑，唔多驚人，其中有一隻叫GiGi，差唔多日日都會坐定定喺張枱擺晒甫士等你影相，仲任摸唔嬲喵~

餐廳主要就提供扒餐同小食餐，啲扒塊塊都大大件，café嘅水準嚟講算係唔錯，有肉汁。芝士煙肉焗薯蓉都係另一道受歡迎嘅菜式，熱辣辣咁焗起，面頭仲有少少脆焦，邪惡得嚟又要食。嘢飲方面，有「黑牛」添呀！如果你未飲過黑牛，少年你真係太年輕，「黑牛」即係朱古力雪糕加可樂，而家唔係淨返好多地方有得飲，去開嘅咪嗌杯試下。

Café Idea

Photos by hiace200 & caca豬 123
呢間café個名雖然唔似得上面嗰啲有個貓字，但一樣有喵星人駐場，仲好歡迎大家同埋佢哋一齊玩添~

除咗有貓玩，仲有boardgame玩。一班friend子上嚟開個飯局係唔錯嘅，可以嗌返個小食拼盤，咩都有得食啲，唔使揀嚟揀去。要飽肚嘅，諗諗個黑松露三文魚燴飯，啲三文魚夠晒厚，黑松露醬味亦好突出。餐廳仲有一系列「貓系」嘅主題飲品，其實都係用唔同嘅生果溝埋一齊，一試無妨呀。

最後提一提大家，去親呢啲貓餐廳，通常都預咗要除鞋、著襪㗎留意返，如果有打算去嗰日，記得執靚仔返個樣，留意衣著呀。

文: Kar

隨時接收最新資訊
讚好OpenRice專頁！