驚圍封/家居檢疫，叫唔到外賣又唔想日日杯麵或者食粟米肉磚飯？平時唔煮開飯嘅朋友，可以睇睇以下幾款推介，無論係當備糧定整嚟帶飯，都叫有多幾個選擇！
1. 蜜糖 / 香辣雞翼
圖：相信好多人都識買啦~叮叮雞翼好處係唔使慢慢解凍、唔使汆血水又煮又焗。市面上雞翼款式多多，甜有蜜糖味、鹹有土匪、辣有水牛城(未搵到真係好辣嘅，有冇人可以介紹返？)……叮之前自己加啲芝麻/香草/芝士/柚子蜜/薯片碎，無論睇定食落都唔會同出面堂食差好多！
2. 日式粥仔
圖：網絡圖片
有時冇咩胃口想食清少少，但又唔想食純白粥咁極端寡，請在家中常備即食粥仔！魚/雞/蟹/蛋味嚟講，我全家一致覺得蟹味最正！但認真一包份量真心唔夠(可能我大食啦)，基本上每人都要兩包再加多3-4粒燒賣/小籠包先為之剛好！(呢款唔叮都可以連袋放落滾水烚5-8分鐘，懶起上嚟可以剪袋即食，做宵夜又暖胃又冇乜大負擔！)
3. 漢堡扒
圖：3分鐘就食得，加隻煎蛋再烚啲西蘭花，擺靚啲真係好打卡able！市面上即食漢堡扒口味都幾多，留意返唔係隻隻叮得，有啲只適用滾水烚，甚至可能要自己煎兩下，前者一般都多汁好送飯，後者可能要自己加個咖哩/茄汁，配個蛋包飯更係宇宙正！
4. 鰻魚
之前出街食一客鰻魚飯，$80幾蚊仲要得三四件魚真係相當常見。其實只要肯花少少時間煲個飯，買條即食鰻魚叮一叮或者煎一煎，倒多些少有得成樽買嘅鰻魚汁，秒變巨型鰻魚壽司真係冇難度！(加份炒蛋同放幾粒車厘茄更靚仔~)
5. 炭燒雞肉串
圖：大昌
同真串燒一定唔可以直接比較，但佢勝在甜甜地又細細粒，大人細路都啱食！平時我就鍾意用佢嚟配南瓜飯、洋蔥炒蛋、鹽燒翠玉瓜或就咁烚斤菜，始終佢味道比較突出，再同重口味餸一齊食就好衝突。
6. 瑞典肉丸
圖：IKEA
雖然可以一叮就食得，但又驚買一包肉丸好難食晒？除咗可以跟個忌廉汁、紅莓醬加自製薯蓉(唔想整都可以買啲加熱水沖嘅~懶到底！)扮大型傢俬舖出品之外，大家仲可以用佢跟個簡單自煮茄汁意粉，氣炸咗佢又可以加啲蒜鹽同泰式辣醬當街邊小食𠻹！
文：Apple