台式茶飲熱潮延續到年底！最近又多一間嚟自台北嘅連鎖茶飲店開到嚟香港，唔單止餐廳名同Logo有兔仔，連吸管都係兔仔嚟！而且舖頭打卡位超多，一杯黑糖珍珠鮮奶都可以好Photogenic呀。
 

兔子兔子茶飲專賣店香港總店開喺天后港鐵站附近，喺地下先點單再行上一樓攞飲品，途中會見到呢幅請插畫師手繪嘅壁畫，係打卡位之一！店面裝修擺設以黃色同黑色為主，幾醒神。
 

黑糖珍珠用嚟自台灣嘅手炒黑糖醬熬製，唔少原材料都嚟自台灣。
 

布朗珠珠黑糖鮮奶（$28）

先嚟一杯黑糖珍珠鮮奶試下，餐廳選用明治100%鮮牛乳，奶香一般勝在口感都幾滑。而黑糖珍珠摸上手暖暖地，搞勻食落口感外軟內偏硬，而且未完全入味。整體飲落以黑糖焦香為主，甜度適中。吸管係特別嘅兔仔吸管，唔少學生買完都立刻影相打卡！
 

任性撩莓珠珠厚奶（$28）

厚奶嘅意思係喺鮮奶加多一層用法國總統牌鮮忌廉同鮮奶打嘅厚奶奶蓋，有原味、抹茶同士多啤梨三款口味選擇。呢款士多啤梨雖然淡粉紅顏色睇落唔明顯，但飲落有士多啤梨酸甜香，同黑糖嘅甜味都幾夾，搞勻飲比一般黑糖珍珠鮮奶清新啲啲。
 

 

藍天朵朵（$30）

喺台灣最受歡迎嘅其實係呢杯藍天朵朵，藍色沙冰係落咗藍柑橘，而白色嘅雲朵其實係忌廉，乳酸口味飲落幾似可爾必思，微酸清新。
 

品牌另一賣點係嚟自世界各地特色嘅鮮奶茶，好似英式嘅藍色淑女伯爵鮮奶茶、意式嘅提拉米蘇鮮奶茶，日式嘅蕎麥鮮奶茶咁，冬天想飲熱飲嘅話可以參考返。
 

兔子兔子茶飲專賣店
地址：天后英皇道14號僑興大廈1樓C鋪

文、相、片：Cathy