今次真係名副其實嘅「踩」過界：賣開鞋嘅潮店C.P.U.最近開旗艦店，奇就奇在裡面居然有間西餐為主嘅Café，有Gimmick有環境有「好西」，仲要價錢唔離地，尖沙咀嚟講算相當高CP值！
 

C.P.U. Café特別邀請咗喺四季酒店等多間五星級酒店同會所擔任過總廚嘅Marton坐鎮，將佢嘅拿手新式西餐帶畀大家。
 

叫得高CP值，就當然唔係得星級水準咁簡單啦，食材配搭新穎配合年輕人口味，價錢亦絕對照顧到各位嘅銀包。小食最平$28起，意粉全部$100有找，最貴嘅海陸大餐有齊牛柳同虎蝦亦唔洗$200。
 

一班人最啱叫幾款小食開心Share，即焗野菌多士、烤意大利黑醋雞翼或者炸魚薯條會唔會係你嘅心水？
 

主食同意粉由賣相到味道都有水準，西班牙紅椒輕辣烤春雞香辣惹味，焗海鮮芝士通心粉豐富滿足。
 

特別推介嘅係各款特色漢堡，牛魔王漢堡用嘅係自家制漢堡扒，配上車打芝士、洋蔥、番茄等配料，足料好味。特級龍蝦包亦特別選用新鮮龍蝦，配埋龍蝦濃湯鮮味十足。
 

照顧埋各位嘅另一個胃，呢度嘅甜品亦各有特色。秘製蘋果酥酥脆香甜，配埋雲呢嗱雪糕一凍一熱口感刺激。另外亦有特製芒果拿破崙同石板街比利時60度朱古力慕斯等選擇。
 

餐廳裝修以簡約黑白同木色為主，再以植物點綴。加埋落地玻璃窗，感覺特別Relax！
 

文：Cathy