繼上次介紹完南丫島同長洲嘅美食，今次到大澳篇啦！開飯仔精選咗5間特色餐廳畀大家，假期去玩時不妨試吓。

傳統手工餅店 大澳餅店

圖：showyoumytummy

去大澳必食嘅傳統手工餅店，沙翁係必食名物之一！沙翁新鮮出爐熱辣辣，蛋香味好濃，質感好鬆軟，咬完一啖會即刻彈返起嚟，加埋甜甜地嘅砂糖真係好出色～因為成日都好多人買，所以通常都好新鮮㗎～另外仲有賣花生同芒果糯米糍。

即叫即製蝦豬餅 蝦豬餅

圖：sky66613

蝦豬餅其實係好似raw咁，用印度薄餅做外皮，包住豬肉同生菜～熱辣辣又香脆嘅手抓薄餅包裹用自家製蝦醬炒香嘅豬肉碎，香濃惹味得嚟又唔會太鹹，好有大澳特色，加埋生菜又可中和油膩感。另外小店仲有賣蝦膏、蝦醬同辣椒油等特產，買返去煮吓通菜同蒸豬肉就啱晒啦。

皮薄餡靚的茶果 茶果財

圖：sweety07

嚟到大澳又點可以唔試吓傳統茶果呢～呢度有賣茶果同糯米糍，眉豆鹹茶粿幾特別，表皮薄得嚟好煙韌同彈牙，食落係滿滿嘅眉豆同菜做餡，好足料。甜味則有花生同紅豆，甜度適中，餡料幼滑，一樣咁好食。另外仲有紅豆同花生糯米糍供應，花生餡裡面加入椰絲同花生粒，口感好豐富又充滿花生香。

大澳聚餐之選 橫水渡小廚

圖：dailyymiscctungg

如果一大班人想搵間有大澳風味嘅餐廳聚餐，呢間就啱晒喇～兩道招牌菜包括香煎墨魚餅同鹹鮮蝦乾荷葉籠仔飯，前者呈金黃色嘅外層煎得好香脆，內部則係軟嫩多汁嘅墨魚肉，鮮味十足仲食到墨魚粒粒。而籠仔飯有鹹鮮蝦乾同豬肉等配料，米飯更充滿蝦乾同荷葉香氣，香濃得嚟帶一點清新，米飯亦粒粒分明唔會太濕，值唔一試。

炭燒雞蛋仔 大澳華記香脆雞旦仔

圖：joychichi

又一間大澳必食！成日聽人講用炭爐燒嘅食物會特別香～大澳呢間炭燒雞蛋仔專門店，一人經營逐底逐底咁燒，每粒都脹卜卜，火侯十足而且好香炭燒味，食落又唔太甜，而且連個邊都好脆㗎～

2024週末食盡離島！
長洲篇：（按此）
南丫島篇：（按此） 
大嶼山篇：（按此）

文：Yanica
編：Cathy