掃街係唔少香港人都好喜愛嘅動作。未夠鐘食飯又掃一掃，食飽飽又要掃一掃，總之，行喺條街度見到一間間嘅小食店就會忍唔住，乜都想食！今次掃街熱點嚟到土瓜灣，雖然土瓜灣真係小僻，但次次掃街都喺葵廣、旺角個個都厭啦﹗今次帶大家嚟呢個舊區，掃街之餘，感受埋呢度嘅「舊時光」，何樂而不為呀？
《大時代》嘅小魚蛋 甘露甜品
圖﹕6pm
提到呢間舊式甜水舖，就一定要提埋當年TVB經典神劇《大時代》都曾經嚟過呢度取景﹗唔好睇佢細細間淨係賣糖水呀，呢度嘅陳皮魚蛋可以話係土瓜灣街坊嘅兒時回憶，同平時食開「又大又彈牙」嘅「假魚蛋」完全唔同；陳皮魚蛋細細粒，咬落有淡淡嘅陳皮味，唔會只得鯪魚腥味。再加少少沙嗲汁，識食一定咁食﹗
皮薄餡靚腸粉 香港腸粉皇
叫得做「腸粉皇」，腸粉選擇當然多過人啦，鮮蝦腸、牛肉腸呢啲就梗有啦﹗但估你唔到仲有梅菜腩肉腸、栗米帶子腸等新奇款式，貪新鮮嘅朋友不妨一試﹗而且呢間腸粉舖賣嘅係即蒸布拉腸粉，皮薄餡靚又足料，口感同連鎖酒樓嘅腸粉完全係兩個level嚟呀﹗
傳統上海栥飯 豆漿王阿媽
想掃街又想飽肚，唔理由食十串魚蛋燒賣醫肚呀？咁不如食個栥飯飲杯豆漿啦﹗呢度嘅栥飯外一層暖暖嘅糯米飯，內一層肉鬆、榨菜，再包住香口嘅油條，望落就非常吸引啦﹗個肚仲有位嘅話，記得試下佢嘅鹹豆漿呀~
大大隻juicy雞髀 囍囍小食部
呢間小食舖價錢夠晒親民，十幾蚊都唔駛就可以食到舔舔脷﹗不可不提佢哋嘅炸雞髀，大大隻又炸得香脆，塊外皮唔會勁油，但咬落去又食到雞髀嘅肉汁，真正做到外脆內軟！
熱辣辣地道泰燒 泰仔串燒
行到晏晒但仲想掃街？呢間泰式串燒店開到凌晨，串燒即叫即燒，外皮燒得非常脆口，而裡面又唔會燒得太乾身，食落口感啱啱好！最受歡迎嘅係燒雞髀，燒墨魚丸同牛丸亦係佢哋招牌，但嚟得泰仔串燒，梗要食返燒酸咪咪豬肉呢啲充滿泰國風味嘅嘢啦~ 再配埋佢哋嘅酸辣醬或沙嗲醬，爭啲以為自己飛咗去泰國呀唔好講笑！
消暑解熱椰汁冰 世紀椰汁
呢度嘅椰汁由新鮮椰肉、淡奶、糖同冰打成，沙冰打得非常細滑，唔會好大嚿冰，夾埋清新嘅椰香，仲唔係消暑良物？沙冰下面就係香濃順滑既椰汁，可謂一杯椰汁，兩種享受呀﹗
文﹕Kiko