酒鬼想暢飲，一次過飲多幾杯唔同嘅酒款，唔使等到10月嘅大型酒節咁耐嘅，上半年都有唔少品酒/酒祭活動，手工啤酒、清酒、威士忌都有，梗有個啱你嘅，Mark低日期啦！

緣繫清酒祭 2019 City’super

呢間大型日超巿，每年都會舉辦清酒祭，今年都唔例外，仲邀請到日本唔同縣份嘅20間酒造，帶咗超過160款清酒過嚟。另外，時代廣場中庭幾乎每日都會有免費講座同工作坊，等各位同好者可以交流交流。

介紹返幾款今次活動嘅特色清酒，新澤嘅純米大吟釀2018入口初段清爽輕盈，中段米香漸現，收結俐落；出羽櫻嘅SWeeeeeT貴釀酒，酒如其名，醇厚甘甜，但甜而不膩。另外亦有幾款冰溫熟成嘅吟釀，酒質圓潤柔和，層次豐富。

日期：即日 – 3月18日
地點：全線City’super

戶外花園啤酒嘉年華  都會海逸酒店

紅磡呢間酒店嘅戶外酒吧，3月尾會舉辦個集美食、啤酒、音樂於一身嘅嘉年華。5個人氣本地手工啤酒品牌：hEROES、少爺、 H.K. Lovecraft、 門神同 Yardley Brothers會供應超過10款手工啤酒，例如：帶黑朱古力同果仁香嘅Hunk Sir（hEROES）、辣辣地而又混合麥芽同焦糖香嘅閻王四川花椒黑啤（門神）、清新果香後以胡椒味作結嘅 !Quit Your Job! （Yardley Brothers）等。新晉品牌H.K. Lovecraft則帶嚟啡紅色嘅lager，同時兼有獨特煙燻木香、焦糖甜香嘅Rauchbier。

咁多酒飲，佐酒小食梗係唔少得。到時可以食到竹炭和牛漢堡、西班牙伊比利亞火腿小食、鴨肝醬配黑松露法式多士等等啊。

日期：3 月22日 (星期五)
時間：6:00pm – 10:30pm
地點：The Patio Bar
入場費：$120 (價錢包括2張代金劵，每張代金劵可換取美食1份或手工啤酒1杯，另可於現場再購代金券)
購票網址

2019香港威士忌節   海景嘉福洲際酒店

至於威迷，就要去尖沙咀呢間酒店喇。3月尾有香港威士忌節！今年嚟到第4屆，足足用上4層地方啊，可想而知有幾多款威士忌可以試到？總共有超過120個品牌、逾1000款嘅威士忌呀！另外仲有多個專家主持大師課程，長知識之餘又可以互相交流下心得。

除咗常飲嘅蘇格蘭同日本外，今次仲可以試到台灣、法國、澳洲、德國、瑞典、印度、美國及荷蘭等多個國家及產區嘅威士忌品牌啊。有幾支可以留意定先：Kavalan 10周年紀念威士忌係台灣以外全球首個地方發佈嘅，Glenrothes Vintage 1988/2011更加係香港巿場上絕無僅有，相當珍貴。另外，蘇格蘭單一麥芽威士忌Clynelish 2010亦特別為是次活動推出香港威士忌節限量版瓶裝，2010年蒸餾，喺木桶熟成9年，限量60瓶咋！活動同時喺室外露天花園設有Bourbon威士忌及美式燒烤露天品酩館，可以邊嘆whisky邊食美式烤肉。

日期：3月30日（星期六）
時間：1:00pm – 8:00 pm
地點：海景嘉福酒店
門票：$320 （價錢包括一個香港威士忌節Glencairn威士忌酒杯、兩個$30代幣、掛杯繩及支裝水）
官方網址

少爺有請啤酒節  少爺啤酒

各位beer geeks上年都可能有去過少爺嘅精釀邀請啤酒節，今年5月又返嚟喇！同上年一樣都係分開兩日四個場次，每個時段以唔同啤酒類別做主題，分別係啤酒花、酸啤、暢飲型+烈性啤酒同埋freestyle時段。各位精釀迷可以按照自己喜好嘅口味去揀時段，大飲特飲。當然，你仲可以買all day pass，咁就幾時去咩款都飲到晒啦~~

今屆啤酒節，除咗有本地嘅酒廠參與外，更加邀請到21間世界各地嘅酒廠嚟參與，包括：紐西蘭、丹麥、澳洲、美國、英國、挪威、愛沙尼亞、俄羅斯、日本、南韓、越南、北京同台灣等，聽到都興奮！再興奮啲嘅消息係，有超過一半酒款係從未公開發售，首次現身香港巿場㗎！嗚好想快啲試晒佢！而家買飛仲有早鳥優惠添！

日期：5月25-26日（星期六及日）
時間：1:00pm – 4:00pm、5:00pm – 8:00pm
地點: 1881公館（尖沙咀廣東道2A號）
門票：$380（180分鐘時段）、$650（星期六/日兩場）、$1100（四場）（價錢包括無限量試飲及啤酒節獨家啤酒杯一隻）
購票網址

文、相：Kar