咁多位酒鬼酒迷準備好迎接「飲酒月」未呀！嚟緊嘅呢幾個月將會舉行大大小小嘅酒展活動，快啲mark低晒啲日子，約埋friend子去chill啦~

Brew in the City （10月11-13日 、18-20日）

望住維港海景歎啤酒同咖啡嘅機會嚟喇，一連兩個週末，海港城都舉行烘焙咖啡及精釀啤酒節，有超過30個本地同海外嘅品牌參加，兼且仲有香港、台灣、日本咖啡師駐場，即席沖製特色咖啡！另外，亦有多款咖啡同酒混合嘅飲料，好似有咖啡雞尾酒、咖啡燒酎、以及本地酒廠H.K. Lovecraft聯乘本地咖啡品牌Roastwork特別為今次活動釀製嘅咖啡拉格淡啤酒，以酒廠招牌Vienna Lager做基底，再加入咖啡味濃厚嘅果仁味咖啡豆進行釀製，各位啡迷酒鬼都唔好錯過喇。

日期：2019年10月11-13日 及10月18-20日 (逢星期五至日)
時間：2pm-7pm  (逢星期五) / 11am-7pm (逢星期六至日)
地點：海港城海運大廈3階 (近OTE 303號舖 – 松藝館)、「海運觀點」 (海運大廈頂層)

德國啤酒節 （10月11-26日）

講到啤酒，又點可以唔提德國啤呀！今年已經係第17屆嘅德國啤酒節啦，開幕當然要搞得隆重盛大啦！開幕禮將會喺King Ludwig(尖東分店) 舉行，到時有「傳統敲啤酒木桶」嚟為成個活動打開序幕，仲有樂隊表演，之後每晚仲會有啤酒競飲賽添。

飲啤酒梗係要有佐酒小食先至暢快！今次仲推出咗一系列期間限定小食，有鹹蛋味爆谷炸雞粒配薯條、炸蝦丸子配柚子沙律等等！

地點﹕King Ludwig
詳情按此

已取消   　Wine & Dine Festival 美酒佳餚巡禮 （10月31日-11月3日）

一年一度嘅美酒佳餚巡禮今年嚟到第十一屆啦！絕對係酒鬼們每年必去嘅盛事呀！今年場內有超過400個攤位，唔單止有「尊尚名酒區」畀大家品嚐嚟自世界各地嘅美酒佳釀，仲有由名廚主理嘅「環球街頭小吃區」等。另外新加入咗佳釀拍賣同美食工作坊等新展區，務求為酒鬼酒迷們提供全新嘅品酒體驗！

有得飲靚酒、食好西之餘，仲有現場音樂表演添。喺中環海濱拎住高腳杯，聽住live show，你都咪話唔chill~想知更多消息，就要留意住開飯仔之後嘅報道喇。

地點﹕中環海濱活動空間及添馬公園
詳情按此

The Patio 環球品酒之旅 （9月30日）

紅磡呢間酒店都有酒展啊！到時現場設有5個攤檔，分別用意大利、澳洲、美國、紐西蘭、法國、日本同香港做主題，供應超過20款唔同嘅靚酒。紅酒、白酒、氣泡酒、清酒都有，仲有香港本土嘅手工啤添！

除咗唔同嘅靚酒之外，場內仲會無限供應多達10款嘅佐酒美食，有燒到卜卜脆嘅西班牙燒乳豬，仲有超香嘅薄荷羊肉丸等~

地點﹕都會海逸酒店 The Patio戶外酒吧
購票詳情按此

Sake Walk （9月21日）

至於鍾意sake嘅朋友仔，都就一定要嚟下呢個全港最大型嘅清酒展啦！今年將會有14間廠商參展，提供超過80款嘅清酒，當中包括以「無過濾生原酒」有名嘅「榮山富士」、山梨縣嘅有氣清酒「七賢」、大家都好熟悉嘅「十四代」等等。當然都有啲配搭小食嘅。

另外，到時仲會有清酒大師班，分享下點樣釀清酒、清酒入門指南等。唔止可以同廠商負責人同釀酒大師交流，兼有品酒師指導大家品嚐4款清酒呢！

地點﹕HOUSE 1881
購票詳情按此

狂熱啤酒節 2019 （9月20日-10月20日）

新界嘅酒鬼想high，唔駛出到九龍咁遠啦~呢間酒吧餐廳喺旺角、沙田同屯門都有分店，飲著冰涼嘅德國啤，試埋佢哋啤酒節嘅限定菜式，由前菜、主菜，到甜品，都非常創新咁加入咗啤酒嘅元素。就好似佢哋嘅燴豬膝就配上黑啤酒醬，仲有夾埋啤酒花泡沫嘅炸意大利雪糕，真係聽都已經聞到酒香啦！今次真係又飲啤酒，又「食」啤酒呀！

地點﹕Beerliner German Bar & Restaurant
詳情按此

文﹕Kiko