鍾意飲酒嘅朋友呢排應該好忙，事關今個十月有四個啤酒節同酒展齊齊輪住嚟。有嘢食有嘢飲之餘仲有嘢玩，即刻嚟睇下先。
King Ludwig德國啤酒節
呢個集團喺啤酒節期間，唔同日子喺各分店都有活動。好似啤酒競飲大賽同推啤酒大賽等，贏咗仲有獎品，啱哂約埋酒鬼朋友嚟挑戰。太刺激唔啱你？唔緊要，餐廳仲特別邀請咗德國樂隊Gehrenbergspatzen嚟表演，嘆住啤酒聽下歌又得啫。
佢哋今年仲推出咗啤酒通行證，$500 就可以係旗下7間指定餐廳嘆10杯德國啤酒，除返開每杯都係$50蚊。港九新界都有分店，放工同同事happy hour就最啱。
詳情
德國啤酒節：
日期：10月6日－20日
啤酒通行證：
日期：即日起至10月31日
參與分店： King Ludwig Beerhall、Prost by King Ludwig、Table 18 Bar & Restaurant、Tong's road house seafood + grill
Erdinger十月啤酒節
啤酒迷應該唔會對Erdinger陌生啦，今年佢就同三十幾間餐廳合作，推出唔同嘅特色美食。好似全線 Beerliner German Bar & Restaurant 都推出咗重量級「肉」全食拼盤，有半公斤慢煮腹肉牛扒、蜜糖啤酒燒春雞同燒豬手等，全部都好啱送酒，份量仲夠3-4人食。仲有期間限定啤酒，一於約埋朋友嚟啤啤佢。
而去開跑馬地馬場嘅都可以留意下Erdinger攤位，係10月嘅逢星期三晚都會有啤酒杯高舉耐力賽同照片攤位等活動，亦會供應兩款啤酒等大家一邊嘆住啤酒一邊睇賽事。
想係屋企都有啤酒節嘅氣氛？無問題，Erdinger十月啤酒節限量版套裝而家係百佳超市都買到啦。套裝有4枝500毫升嘅小麥啤酒，再送埋靴型啤酒杯一個，夠哂特別。
馬哥孛羅德國啤酒節
今年已經係第26年舉行，Fans當然唔可以錯過！今年繼續都係由Erdinger獨家供應各款啤酒。一定要試嘅有會場限定嘅拉格淡啤酒(Fischer's Helles)，麥味香濃。而另一款限定版小麥啤酒 (Erdinger Oktoberfest) 亦都係必飲，呢款啤酒每年只會釀造一次，色澤金黃，入口仲帶微微嘅清新果香，配埋傳統德國美食就最夾。
而嘢食方面都幾多選擇，有燒豬膝、香煎紐倫堡式肉腸同燒羊脾等主食。唔想食咁飽嘅就可以揀蘋果酥卷、黑森林餅同德國咸麥包圈等小食。夜晚仲有來自德國嘅樂隊Die Notenhobler演出，有嘢食有嘢玩一定唔會悶。
詳情
日期： 10月20日 - 11月11日
時間： 06:00pm – 11:00pm（Happy Hour：每晚6-7pm）
地點： 尖沙咀海港城馬哥孛羅香港酒店6樓海景露天廣場
票價：
星期日至四 ：$160 【包1杯啤酒】
星期五、六：$280【包1杯啤酒及1隻紀念啤酒杯】
註：凡於Happy Hour時段於吧檯櫃位以八達通購買1杯啤酒，即可於現場換購多1杯啤酒
city’super 葡萄酒及烈酒展
飲咗咁多啤酒不如轉下口味飲葡萄酒同烈酒，呢間百貨超市就推出咗多款唔同種類嘅酒。好似Ca’del Bosco Chardonnay 2011 就啱哂鍾意果香味嘅朋友，佢帶少少煙燻同礦物味，最啱用嚟襯海鮮或者硬芝士。
除咗酒之外，佢哋仲新推出咗紅酒漬去污劑。你知啦，有時一班人係屋企開party總會唔小心倒瀉嘢，啲紅酒漬真係好難抹走。呢枝嘢就標榜可以快速分解污漬，細細枝擺定係展企以備不時之需都唔錯。
詳情
日期： 10月5 - 18日
地點： city’super 海港城及國際金融中心商場店、時代廣場中庭
同場加映：限量版Johnnie Walker Black Label The Director’s Cut
Johnnie Walker今次同電影《銀翼殺手 2049》合作，推出限量版威士忌。電影講述未來人類同複製人世界嘅科幻歷險。而威士忌嘅酒精濃度係49%，比一般威士忌多咗9%，口感更加醇滑，並有獨特嘅香草芳香，帶出電影中複雜而神秘嘅世界。呢款威士忌全球限量39,000支，而全港只有240支，係銅鑼灣SOGO獨家發售，有興趣嘅朋友要快啲去搶啦。
文：Crystal
相：Kar
相：Kar