於天后默默耕耘十四年，已經建立不少口碑嘅甜姨姨甜品店，最近衝出天后進駐銅鑼灣，新店位於「搵食」熱點銅鑼灣耀華街，更推出首創嘅刨冰系列，用上日本空運到港嘅冰磚同日本冰機，因為日本冰同本地製作嘅冰結冰點同水源唔同嘅關係，刨出嚟嘅冰一絲絲咁好幼滑，口感綿密。而且仲有好多創新同人氣口味，例如好有港式Style嘅奶醬脆多口味同人氣嘅榴蓮味等，甜品控要Bookmark呀！
醬爆奶醬脆多（$88）
刨冰平時食得多，但醬爆奶醬脆多口味你又食過未？奶醬脆多口味嘅idea就來自港式茶記奶醬多，冰磚分三次刨成一層又一層嘅球狀冰山，而每一層都會加入秘製嘅花生奶及花生碎，花生奶香口輕盈，最後再將成個冰唧滿花生奶，面層再鋪上豆腐奶蓋及新鮮焗起嘅脆多士塊，再唧上煉奶及花生醬，係好香濃嘅花生味呀！
汪阿姐火龍果（$90）
取名好有趣嘅汪阿姐火龍果，成個刨冰一樣唧滿自製火龍果汁，加上新鮮紅火龍果肉及營養價值豐富嘅奇亞籽，味道清甜又健康。中間加入椰果及爆炸糖仲可以增加口感！
留戀榴蓮豆腐花（$108）
當然唔少得近年大熱亦係甜姨姨招牌嘅榴蓮甜品！今次呢個榴蓮豆腐花刨冰加入榴蓮醬汁、榴蓮蓉及豆腐奶蓋，一入口係超重口味嘅榴蓮香，榴槤控必食。
更多【新店直擊】： |
黑極～黑芝麻豆腐（$88）
呢個全黑刨冰真係好吸睛，用上黑芝麻製作，再加上同黑芝士勁夾嘅豆腐奶蓋同埋鳥結糖，每一啖都係濃濃嘅黑芝麻香氣，而且又唔會太甜！
草莓乳酪（$88）
想食啲清新嘅口味，草莓乳酪都係一個好選擇，而且成個刨冰呈現粉紅色，啱晒各位foodie們打卡！
台式仙草手工芋圓（$48）
想試埋餐廳其他甜品，大推呢個經典台式仙草手工芋圓，有七種配料，包括芋圓、仙草、紫米、薏米、紅豆、 西米、黑珍珠，好豐 富，糖水底可自選椰汁或黑糖。芋圓全部逐粒自家製，口感煙韌，仙草亦都係自己煲，加入店主 Candy 最愛嘅中藥，味道略帶甘苦，有少少似初階版嘅龜靈膏，口感滑溜，係誠意之作～
地址: 銅鑼灣耀華街11號地舖
文、相、片: Yanica