(2021/08/12 更新：國際金茶王大賽冠軍陳子平師傅現已離職)

港式奶茶Fans有口福啦，旺角呢間新開冰室搵嚟國際金茶王大賽冠軍陳子平師傅坐鎮，每杯茶王之王奶茶都由師傅親手沖調，保證係正宗香港味！食物嘅水準同賣相同樣出眾，招牌沙嗲牛肉蛋包包用滑蛋包住沙嗲牛肉三文治，雞翼用川式麻辣醬汁煮至入味，有驚喜。
 

茶王冰室由陳子平師傅同幾位熱愛港式奶茶嘅八九十後合作開設，希望用新手法演繹香港奶茶同冰室文化。裝修亦揉合新舊元素，霓虹燈牌、墨綠色卡位，格仔地磚等等，令冰室變成新打卡點！
 

入行超過20年嘅陳子平師傅喺2016年贏得國際金茶王大賽國際賽及香港區冠軍，而且港式奶茶技術係香港非物質文化遺產之一，師傅經常為香港旅遊發展局等機構示範表演，功架十足！問到沖一杯色香味俱全奶茶嘅秘訣，師傅就話重點係一沖、二焗、三撞、四回溫，當然重點係細節要掌握得好，例如沖茶水溫、撞茶嘅速度、次數等，非常考驗師傅手勢。
 

茶王之王（$88）

同一般茶餐廳奶茶唔同，擺盤有如精品咖啡。想試真啲大師作品係有步驟嘅，先試細玻璃杯裝嘅茶王奶茶，飲啖水清一清口腔，再試杯茶王之王。品嘗茶王之王要記住四字秘訣：望、搖、聞、喝，先欣賞明亮帶金黃色嘅奶茶，輕搖杯身睇下有無掛杯以證明夠濃郁，聞一聞淡奶同紅茶平衡嘅香味，最後品嚐呢杯香滑而層次豐富嘅奶茶！
 

紅茶底非常講究，由師傅親身飛去斯里蘭卡挑選茶葉，普通版奶茶用四種唔同茶葉調配，茶王版更加用上六種，粗幼各有唔同，取各自嘅色澤、香氣、味道。坊間部分奶茶用嘅茶葉唔夠好，聞起嚟有草青味而且飲完會覺得嚡口，呢杯茶王就完全無出現呢啲缺點，而且有回甘完全唔需要加糖。師傅話飲奶茶最啱配小甜點，所以配搭鬆脆嘅唧花曲奇。
 

樽仔奶茶（$30）

未有時間仔細品嘗茶王嘅話，樽仔奶茶亦係個唔錯嘅選擇，沖好嘅奶茶放到玻璃樽裡面雪凍，咁就唔怕加冰沖淡茶香。比起茶王味道層次的確係少啲，不過同樣濃郁、口感幼滑而且甜度適中。而且樽仔似威士忌酒樽咁夠哂型，最啱相機飲先。
 

沙嗲牛肉蛋包包（$48）

招牌沙嗲牛肉蛋包包唔單止個名夠特別，賣相亦非常搶眼！滑蛋山由約四五隻蛋炒成，裡面係港人最愛之一沙嗲牛肉三文治，分量唔細建議兩個人Share。蛋漿用咗唔同產地雞蛋混合而成，香味同顏色都啱啱好，口感亦夠嫩滑，配埋鬆軟方包、鬆化嘅沙嗲牛肉，口感層次討喜。而且沙嗲醬微辣，同雞蛋香好夾。
 

 

麻辣雞翼（$38）

瑞士雞翼就食得多，冰室試麻辣雞翼就真係第一次。靈魂麻辣汁由餐廳一位四川師傅調配，特別選用四川嘅花椒同八角，香味更突出之餘亦保證係正宗麻、辣、香嘅四川風味。食落先麻後辣，雞皮完全入味而雞肉夠嫩滑，最厲害嘅係後勁都幾強，嘴唇Keep住有少少麻，各位愛辣之人或者鍾意刺激嘅朋友唔好錯過！
 

常餐（A餐 $48）、茶王西柚茶（單點 $21/凍）

常餐有牛油多士、荷蘭牛乳炒滑蛋配火腿，同沙嗲牛肉出前一丁。炒滑蛋同蛋包包嘅雞蛋配方有少少唔同，雞蛋顏色更橙黃之餘蛋味亦更突出，不過滑度就稍低。沙嗲牛肉口感嫩滑而唔過腍，配惹味嘅沙嗲醬同出前一丁，簡單而滿足。
 

茶王西柚茶嘅紅茶底同奶茶一樣，茶湯紅亮清澈。配搭由常見嘅檸檬改為西柚，同樣微酸解膩，但少咗一陣檸檬皮嘅澀味。細心留意嘅話會發現餐廳選用環保竹纖維飲管，其實外賣用具亦盡量以環保為主，細節位加分！
 

茶王冰室
地址：旺角洗衣街113號地下

文：Cathy
相、片：Tom Li