銅鑼灣呢間日式放題好有gimmick，可睇到即劏即食嘅藍鰭吞拿魚表演，食客們個個反應好熱烈，舉機不斷！除此之外，餐廳仲新增自助餐枱，擺放一啲冰凍海鮮、前菜，畀客人們食住等刺身壽司！新放題有乜啱食？快睇開飯仔試食報告！

逢星期二先有嘅即劏原條藍鰭吞拿魚show，原本只做到10月尾，但反應實在太熱烈，餐廳決定延長至11月尾。來自印度洋嘅藍鰭吞拿魚，一條都成60幾公斤，搬動時都要2-3人先搞得掂，好勁！

劏魚前，一班客人就已經拎定手機排排企，好熱鬧！大約6:30pm左右，師傅就會開始將赤身、大拖羅、中拖羅等部位切成一條條，再切做一塊塊分畀客人！

每位客人每次可得到3塊，好肥美。赤身入口清爽，大拖羅油脂味濃，至於中拖羅就最受客人歡迎，食得多都不太感油膩。

任食象拔蚌！

象拔蚌爽脆又彈牙，一向受客人歡迎。所以今次有得任食，梗係食多幾件回本啦！

新增自助餐枱！

除咗藍鰭吞拿魚，自助餐枱上亦有蝦、蜆、芝麻八爪魚、海蜇及泡菜，仲有磯燒鮑魚、溫泉蛋沙律、龍蝦蛋沙律、是日燉湯、燕窩燉蛋等，好豐富。

仲有鴨胸沙律、腰果、枝豆、豆腐沙律等小食。

餐枱亦有少許熱盤，如(左)炸物拼盤、(右)炒蟹。

3款任飲酒品！

餐廳有清酒吧，可任飲杠竹梅清酒、CHOYA梅酒。 杠竹梅清酒較為辛辣有後勁，最啱配刺身。

CHOYA梅酒就比較易入口，甜味重少少，幾啱女仔飲。

仲有2-3款啤酒，一樣可任飲架！

新款剔紙仔食物！

至於一向都有嘅剔紙仔亦加入幾款新食物，有(左)蒲燒鰻魚、(右)鮑魚冬蔭功海鮮鍋。

新增嘅芝味系列有汁燒芝士北海道帆立貝壽司、醬燒芝士鮮蝦壽司、他他醬芝士吉列蝦卷、芝士長腳蟹棒壽司、火炙厚燒芝士鰻魚壽司及芝士軟殼蟹卷。

必食推介：

香港人必食嘅各款刺身：三文魚、甜蝦、帶子、鮑魚、油甘魚、大赤貝、大赤蝦、希靈魚等。

熱盤就有(左)避風塘黃金炒蟹、(右)鹽燒牛舌。

開飯仔就鍾意(左)芝麻雞翼、(右)芝士年糕。

密密食甜品！

甜品都有十幾款甜品選擇架，最讚嘅係每款細細件，可試多幾款，有布丁、啫喱、芝士蛋糕、泡芙等。

新鮮即爆嘅爆谷脆卜卜，配埋雪糕一齊食，口感一流。

食到最後記得留留留肚，每位客人可得到Häagen-Dazs或者Mövenpick雪糕1客架！

多到揀唔到 10幾款飲品！

梳打、汽水、茶、玉露等乜都有，另有紫貝天葵白桃梳打、藍蝶花冰糖雪梨特飲、藍糖白桃梳打及藍糖荔枝梳打4款台式飲品。

滿屋日本料理
地址：銅鑼灣駱克道463-483號銅鑼灣廣場二期8樓
價錢：星期一至四 $238/位；星期五至日及公眾假期前夕 $248/位

滿屋日本料理
地址：荃灣眾安街55號大鴻輝(荃灣)中心10樓
價錢：星期一至三 $238/位；星期四 $248/位；星期五至日及公眾假期前夕 $258/位

文：Joy